Общероссийский калык фронтын Марий Элысе региональный отделенийжын еҥже-влак Медведево район Азаново селаште илыше калыкын мучаш марте чоҥен шуктыдымо стадион-спортплощадкыште паша шогалме шотышто вуйшиймашыштым тергеныт, тысе еҥ-влак дене вашлийыныт. Тысе футбол полеште Марий Элын первенствыжын икымше лигыштыже модшо команде-влак таҥасат, «Азаново» команде тренировкым эртара, верысе спортшколын воспитанникше-влак капкылым шуарат, кыдалаш школышто тунемше-шамыч кече физкультур урокыш лектыт.
Спорт министерстве республикын тӱрлӧ кундемыштыже ныл стадион ден спортплощадкым ыштыме нерген лач талук ончыч увертарен. Азановышто ышташ молыж деч эн шуко окса, 5 миллионат 252 тӱжем теҥге, ойыралтын. Контракт дене келшышын, спорт объектым тӱрыснек кодшо ий августлан шуктышаш ыльыч. ОНФ-ын активистше-влак рашемденыт: тымарте школ марте пурымо да футбол стадион йыр куржталме корным гына асфальтаным ыштыме. Калыклан таҥасымашым ончаш трибун, физкультур дене заниматлаш, баскетбол да волейбол дене модаш площадке уке.
Верысе калык министерствыш ятыр гана йодын возен, но туштыжо синтетикым велыман покрытийым конден шындаш, изи архитектур формым ышташ контрактым окса укелан кӧра кӱрлмӧ дене умылтарат. Тенийлан улыжат 60 тӱжем теҥге ойыралтын.
— Чоҥаш тӱҥалмеке, мучаш марте шуктыман ыле. Тылеч ончыч школ воктене турникат, куржталаш чаракан корнат, волейбол площадкат, шинчаш теҥгыл-влакат лийыныт, — ӧпкелен ойлат верысе еҥ-шамыч. – Нуным чыла кораҥденыт, а ужым ыштен ышт шукто. Мемнан икшывына-влак талук мучко тушто вийым погеныт.
ОНФ-ын активистше-влакым республикын моло районыштыжат спорт объектлам эркын чоҥымо азапландара. У Торъял ден Шернур поселкылаште, Курыкмарий район Виловат селаште физкультур ден тазаҥдыме комплекслам ыштыме паша кудымшо ий шуйна, мучашыже гына ок кой. Тидын голымак Шернурысо у спорт объектлан налме оборудований, спортарвер верысе муниципальный учрежденийлаште нылымше ий кият.
— Ме нине объектлам чоҥен шуктымеш тушто паша кузе кайымым тергаш, власть орган-влак калыкын йодмыжым колышт да шуктышт манын тыршаш тӱҥалына. Тыгай «спорт полуфабрикат» манме объектла улмо нерген рӱдӧ штаб марте шуктенна. Тушто ты йодышым регион вуйлатыше-влак марте шукташ сӧреныт, — палемден Марий Элыште ОНФ-ын региональный штабшын сопредседательже Р.Гизатуллин.
А.АНДРЕЕВ.
Снимкылаште: Азановысо футбол полеште республикын первенствыжын икымше лигыштыже модшо команде-влак чӱчкыдын вашлийыт; (2114) калыклан таҥасымашлам ончаш тыгай йӧн веле. (2423 але 2425)
Авторын фотожо.
