УВЕР ЙОГЫН

Намысым палыде руат

Килемар, Курыкмарий, Марий Турек, Оршанке, Звенигово районласе лесничествыште чодырам шолып руышо-влак чылаже 240 наре пушеҥгым руэн наҥгаеныт.

Килемар районысо лесничествыште чодырам шолып руышо-влак 230 утла пушеҥгым йӧрыктеныт да луктыныт. Республикын чодыра озанлыкшылан могай эҥгек ышталтме кызыт рашемдалтеш. Шолыштмо шотышто материалым правам аралыше орган терга. Тений мартыште ты районысак Визымйыр лесничествын ик кварталыштыже тораштак огыл ялыште илыше  ўдырамаш 132 пушеҥгым руэн ыле. Тыге ужар поянлыклан 340 тўжем утла теҥгеаш эҥгекым ыштен. Тудын шотышто уголовный делам тарватыме да мут кучаш шогалтыме.

Кодшо кечылаште Курыкмарий районысо Йоласал чодыра участкыште лесник иман ныл пушеҥгым руэн наҥгайымым ужын. Эҥгек 7 тўжемат пеле теҥгем вончен. Полицейский-влак пашадыме 46 ияш пӧръеҥым кученыт. Мутшо почеш, озанлык оралтым чоҥаш руэн. Звенигово район Элнет чодыра участкыште 44 ияш пӧръеҥ иман кокыт да лышташан ик пушеҥгым йӧрыктен. Тудо ик делянкыште чодырам ямдылен, а тулеч ӧрдыжтӧ клеймитлыдыме кум пушеҥгым паленак руэн. Вараже полицейский-влак рашемденыт: нине пушеҥге поснак аралыме кундемыште кушкыныт, сандене нуным руымылан пеҥгыдынрак йодыт. Эҥгек оксам 89 тўжем теҥгем шотлен луктыныт.

Кодшо кечылаште Звенигово кундемысе Шолеҥер лесничествыште 46 иман пушеҥгым, чылаже 100 кубометр лишке, руен наҥгайыме шотышто дела шымлылтеш. Титакан еҥым, 50 ияш пӧръеҥым пален налме, эҥгек кугыт рашемдалтеш. Оршанке районысо Шулко кундемыште палыдыме еҥ-влак 722 тўжем теҥгеаш лышташан да иман пушеҥгым шолыштыныт. А теве Марий Турек районысо лесничествыште 33 ияш пӧръеҥ, тудлан ойырымо делянкыш пураш корным почмо амал дене 15 иман пушеҥгым йӧрыктен, ужар поянлыклан 10 тўжем теҥгеаш эҥгекым ыштен.

Чыланат уголовный дела почеш мутым кучаш тўҥалыт.

А.АНДРЕЕВ.

Снимкыште: руымо шым пушеҥгым 100 тўжем наре теҥгелан аклыме.

(Фотом Марий Эл МВД-н пресс-службыж гыч налме)

Опубликовать в Одноклассники

Добавить комментарий