УВЕР ЙОГЫН

Пашам ышташ полшыман, а тергымаш дене йӧсландарыман огыл

Кодшо кугарнян Йошкар-Олашке паша визит дене Россий правительствын «Открытое правительство» системым формироватлыме шотышто департаментшын директорын алмаштышыже, РФ-ште контрольно-надзорный  да разрешительный пашам саемдыме шотышто правительстве подкомиссийын секретарьже Андрей Спиридонов лийын.

 Федеральный правительствын членже КНО реформо йодыш-влак шотышто кумдаҥдыме совещанийыш лӱмынак толын. Тушко РФ правительствын аппаратшын тидлан мутым кучышо пашаеҥже, Марий Эл вуйлатышын пашажым шуктышо Александр Евстифеев, Марий Элыште тӱҥ федеральный инспектор Петр Журавлев, исполнительный кучемын федеральный органже-влакын территорийальный подразделений вуйлатышышт ден алмаштышышт, бизнесъеҥ-влак чумыргеныт ыле. 

Андрей Спиридоновын палемдымыж почеш, тиде приоритетный кугыжанаш программым илышыш пуртышашлан пӧлеклалтше вашлиймаш тыгай формат дене икымше гана эртаралтеш да ты шотышто Марий Эл вес субъект-влаклан пример лийын кертеш, вет республикна – контрольно-надзорный паша реформым Россий Федерацийысе регион-влак кокла гыч ик эн ончыч илышыш  пурташ тӱҥалын.

 Совещанийым почмо годым Александр Евстифеев эн ончычак селекторный совещанийыште Россий правительстве председатель Дмитрий Медведевын каласыме  эн тӱҥ шонымашыже-влак дене палдарыш, тыгак Марий Элыште КНО паша реформо шукталтме нерген каласкалыш.

— Контрольно-надзорный пашан кызытсе форматше  предприниматель-влаклан веле огыл, республикын бюджетшыланат эҥгекым ышта. Утыжден чӱчкыдын да шуко тергымашым эртарыме дене предприниматель-влак веле огыл йӧсланат. Муниципальный бюджетлаште окса укелык тӱрлӧ кычалтылмашлан амалым ышта, да умбакыже контролироватлыше орган-влак штрафым тӱлаш пеламдат, тыгодым муниципалитет вуйлатыше-влак лӱмешат, — мане Александр Евстифеев.

 Тыгак тудо штраф чӱчкыдынак эмлымвер, школ, моло бюджет  организаций-влаклан тӱлаш палемдалтеш, а тидыже республикын бюджетыштыже уда велым палдырна манын ойлыш. Весымат палемдыш: оксам ик кӱсен гыч весыш, ик бюджет гыч весыш кусаркалыме дене пайдаже уке. А тиде пашам ышташ кадр ресурс кучылталтеш. Предприниматель-влакын контрольно-надзорный орган-влак дене пашам ыштыме правилат эреак вашталтмылан, южгунамже йодмашыштын йӧршеш ваштарешла улмыштлан предприниматель-влак вуйым шийышт.

 — Правовой регулирований «вошт койшо» да кажне  предпринимательлан, айдемылан, чиновниклан умылаш лийше лийшаш. Марий Элыште экономике сӱрет тыглай огыл. Мыланна предприниматель-влаклан чолганрак пашам ышташышт условийым ыштыман, бюджет дене кылдалтше йодыш-влакым рашемдыман. Сандене контрольно-надзорный паша реформылан полшымаш – мемнан пашаште эн тӱҥ, — мане регион вуйлатышын пашажым шуктышо. 

Реформым илышыш шыҥдарыме шотышто Марий Элыште пашаче группым ыштыме. Тушко министр, контрольно-надзорный орган-влакын еҥышт ден предприниматель-влакым пуртеныт.

 Исполнительный кучем орган-влакын официальный сайтлаштышт 15 август марте обязательный йодмаш акт радамым вераҥдышаш, 15 сентябрь марте конрольыш налме субъект ден объект-влак радамым еҥ-влаклан  палдараш лукшаш улыт. А 30 сентябрь марте контрольно-надзорный пашан лектышыже да пайдаж дене палдарыше радам ышталтшаш, — ойлыш Александр Евстифеев.

Совещанийыште  исполнительный кучемын икмыняр федеральный органжын территориальный подразделенийжын вуйлатышышт шуктымо пашашт, але марте мо ышталтме нерген каласкалышт. Южыштлан погынышо-влак кокла гыч йодышым пуышт. Александр Евстифеев кажныжын ойлымыжым моткочак тӱткын колышто да шке ойжым ешарыш, тӧрлатымашым пуртыш да шылталенракат палемдыш.

Совещанийыште Андрей Спиридонов Россий Федерацийыште контрольно-надзорный пашаште реформым эртарыме тӱҥ направлений-влакым палемдыш.

Реформо 2025 ий марте илышыш пурталташ тӱҥалеш.

Любовь Камалетдинова.

Опубликовать в Одноклассники

Добавить комментарий