УВЕР ЙОГЫН

«Сай велыш вашталтышым ыштен кертмылан ӱшанен кӧненам»

        «Сай велыш вашталтышым ыштен кертмылан ӱшанен кӧненам»

Марий Эл вуйлатышын пашажым жаплан шуктышын пунчалже дене Владислав Зотиным шукерте огыл Марий Эл Республикын Общественный палатыжын членжылан пеҥгыдемденыт ыле. Тыгай темлымаш дене «Марий Ушем» лектын. А шочмын эртыше заседанийыште тудым Общественный палатын председательжылан сайленыт.

Тиде должностьышто кокымшо паша кечынже ме В.М.Зотин дене вашлийын мутланышна.

— Владислав Максимович, регионысо Обшественный палатын еҥже лияш, а вара тудым вуйлаташ темлымаш Тыланда вучыдымо лийын?

— Мутат уке, вучыдымо лийын. Вашлиймекына, Александр Александрович йодо: «Те Общественный палатыш пашам ышташ каяш келшеда?» «Кузе каласеда. Тушто мыйын пашам ышташ кӱлмылан шотледа гын, келшем», — маньым. Регионысо палатыш пашам ышташ толаш келшымем нерген йодмыж годымак мыйым тыглай членлан гына огыл тушко темлымыжым умыленам. Ме, политик-влак, икте-весынам пел мут, ик ончалтыш гычак умылена. Мыят шке статусем палем, санденак молан тышке ӱжмыжым умыленам.

— Молан?

— Ме Александр Александрович дене але марте вич гана вашлийынна да тиде жапыште ятыр шотышто шонымашна икгай манын шижынам. Александр Александровичлан республикым нелылык гыч лукташ, нӧлташ да вияҥдаш полшаш кӱлеш. Тидым ой-каҥашем-влак дене, пашам дене ыштем. Мый дечем вара могай предприятийым петыреныт да пытареныт – нуным угыч пашашке колташ тыршаш тӱҥалына. Мый мом кузе ыштышашым темлем, а мутем шотыш налаш да нунылан эҥерташ але уке – тиде тудын пашаже.

Общественный палатын председательже улам гынат, тиде – мер паша. Мый ик теҥгемат ом нал. Кеч аппаратыште кок еҥлан пашадар тӱлалтеш.  

— Тиде паша Тыланда уто тургыжланымашым ешара. Те темлымылан тореш лийынат кертында…

— Тореш лийын кертынам, но тыгай шонымашем шочынак огыл. Мыйым республикылан пайдам ыштен кертше еҥлан шотлат гын, тугеже полшыман, пайдам кондыман, шоненам.

— У ӱштервоштыр у семын ӱштеш, маныт. У вуйлатыше семын Те мом ышташ палемдеда?

— Кызыт мыйын тӱҥ задачем – Марий Элыште илыше тӱрлӧ калык ваш келшен илыже манын тыршаш. Кадр дене пашам ыштыман. Маркелов вуйлатыме жапыште тиде паша йӧршын гаяк ышталтын огыл. Пытартыш жапыште районлаште да пӱтынь республикыштат вуйлатыше-влакым вашталтат. Тиде умбакыжат лиеш. Сайлымаш деч вара кадр состав эшеат уэмдалтеш. Нуным ончылгоч ямдылыман. Шотан, сай шуко пашаеҥже республик деч ӧрдыжкӧ каен. Нуным пӧртылташ тыршаш кӱлеш.  Общественный палате мый дечем ончычат пашам ыштен да шуктышаш паша планжымат палемден да пеҥгыдемден. Сандене мый ешартышым темлен да пуртен гына кертам. А шонымашем ден ыштышаш паша шуко. Но тиде должностьышко толын, калыклан, республикылан полшен кертмылан ӱшанем огеш лий гын, чапым волтен, председатель лияш ом кӧнӧ да ялыштем шинчем ыле. Сай велыш вашталтышым ыштен кертмылан ӱшанем да санденак пашам ышташ кумылем уло.   

— Тугеже калыклан, кундемналан полшымо пашада ушныжо, Владислав Максимович.

— Тау.

Любовь Камалетдинова мутланен.

 

Опубликовать в Одноклассники

Добавить комментарий