УВЕР ЙОГЫН

Оксам аныклыман, вияҥдаш полшыман

Кодшо кечылаште Александр Евстифеев Марий Турек районыш миен.

Тушто эн ончычак районысо рӱдӧ эмлымверыште лийын.  

Александр Евстифеев азам ыштыме да йоча отделений-влакым, процедурный кабинет ден эмлалтше-влаклан палатым ончен савырнен, пашаеҥ-влак дене мутланен. Тидын годым палемден: районласе да села ден ялласе эмлымверыш самырык специалист-влак толышт манын, республикын правительствыже да федеральный рӱдер чылажымат ышташ ямде улыт. 

 «Земский доктор» программе почеш Марий Турек ЦРБ-ште кызыт 5 врач пашам ышта. Но тиде – шагал. Эмлымверыште участковый врач-терапевт, педиатр, стоматолог да акушер-гинеколог огыт сите. Тиде амал дене  южо врачше палемдыме жап почеш пашам ышташ толын кая. 

Район администраций вуйлатыше Сергей Решетов палдарен: «Тазалык» приоритетный национальный проект почеш больницылан жаплан келшыше оборудованийым налыныт. Тудым пашаш колтымо дене черым тӱҥалмыж годымак пален налаш йӧн уло. 

Тыгак Марий Турекысе ЦРБ-м  капитально олмыктеныт да реконструкцийым ыштеныт. Районласе больнице-влак коклаште тиде медучреждений кызыт ик эн сайлан шотлалтеш.

Кеч эше нелылыкшат уло. Мутлан, леведышым тӧрлаш кӱлеш. Кызыт тидлан проектно-сметный документацийым ямдылат. Шотлымо почеш, паша 7 млн. утла теҥгешке шуэш. Республик вуйлатышын пашажым шуктышо тиде йодышлан кучем тӱткышым ойыра манын палемден.

Тиде учрежденийыште 20 тӱжем наре еҥлан полыш пуалтеш. Нунын коклаште 4000 утларакше 18 ияш марте ӱдыр-рвезе-влак улыт.  

Районышто 36 врач пашам ышта. Идалык ончыч 32 лийын. 2016 ий мучаште районыш кум «Вашке полыш» машина толын.  

– Здравоохранений системе эн кӱлешан отрасльлан шотлалтеш. Медицине полышым жапыштыже да качественно пуыман. Сандене улшо неле йодышыштым рашемдыме годым республикысе медучреждений-влак полыш деч посна огыт код, – Марий Турек ЦРБ-ште пашам ыштыше-влак дене мутланымыж годым палемден Александр Евстифеев.

Ончыкыжым тудо республикын кажне муниципал районыштыжо улшо социально-кӱлешан объектлам ончен савырнаш палемда. Эн ончычак больнице, школ да йочасад-влакын пашашт дене палыме  лиеш.

                        * * *

         Тиде кечынак Александр Евстифеев ты районысо «Акпарс» агрофирмыште лийын.

– Озанлыклан ешартыш инвестиций кӱлеш. Но банкысе кугу ставке-влак нелылыкым луктыт. Предприятий умбакыжат вияҥже манын, ме келшен толшо йӧным мушаш улына, – палемден тудо.

Агрофирмын генеральный директоржо Гадил Ахатовын каласкалымыж почеш, «Акпарс» 2006 ийыште ышталтын. Панрутыш лекше озанлыкым налмеке, ферме-влакым шотыш конденыт. Вольыкым 80 вуй гыч 500 марте шуктеныт. Кызыт озанлыкыште 1200 вуй тӱкан шолдыра вольыкым ашнат. Арып ялысе фермыште – 744 вуйым. Тышеч 272 – ушкал.

– АПК-м вияҥдыме федеральный программе дене келшышын, тиде предприятийлан кугыжаныш велым полыш пуалтеш, – рашемден республикын ялозанлык да продовольствий министрже Юрий Сидыганов.

– Тиде – моткоч ойыртемалтше озанлык, молан манаш гын тӱрлӧ направлений дене пашам ышта. Пашаеҥ-влакым ӧрдыж гыч огеш нал. Еҥ-влаклан тыште пашам ышташ келша. Мемнан задачына – предприятий умбакыжат вияҥже манын, чылажымат ышташ, – палемден журналист-влаклан А.Евстифеев.

                                       * * *

Марий Турек районыш мийымыж годым республик вуйлатышын пашажым шуктышо тыште илыше-влак дене вашлийын.

Тудо палемден:

– Оксам аныклышашлан чиновник-влак аппарат палынак иземеш, молан манаш гын, мыйын шонымаште, кызыт тудо утыжден «пуэн овартыме». Шке обязанностетым шуктет, пашам ыште. Пашат шотлан ок тол – кает да моштымашетлан келшышын вес паша верым кычалат, – ойлен А.Евстифеев.

Республикыш инвестицийым кондымаш, фермер ден личный подсобный озанлыкым кучышо-влаклан полшымаш, тунемше-влаклан учебникым ситарымаш, йочасадлаште икшыве-влаклан верым ойырымаш, школлашке тора ялла гыч тунемше-влакым шупшыктымаш, уда корно – погынышо-влакын нине да икмыняр моло дене кылдалтше йодышыштлан республик вуйлатышын пашажым шуктышо ден министерстве-влакын представительышт вашештеныт.

Пашаче визитше жапыште Александр Евстифеев райрӱдысӧ тӱвыра да каныме паркым ончен савырнен. Тудо «Формирование комфортной городской среды» программыш пурталтын.  Проект дене келшышын, районысо кучем паркым тӱзаташ да, эшеат сӧралрак лийже манын, пушеҥге ден вондерым шындаш палемда. Тыгак Кугу Отечественный сарыште вуйыштым пыштыше салтак-влаклан памятникым, корным тӧрлатыман, улшо йоча площадкым уэмдыман. Тидлан чылаже 1 миллион утла теҥге окса кӱлеш.

Л.Камалетдинова.

Опубликовать в Одноклассники

Добавить комментарий