ЯЛ ИЛЫШ

Шыже пеледыш…

 

   Советский район Шабашанысе шнуй вӱдлан кайыме годым Коремтӱрым эртыман. Ялыште ятыр ойыртемалтше сурт коеш.  Южо суртоза, поликартбонатым, кызытсе жаплан келшыше чоҥымо моло материалым кучылтын, пӧртшым комыжла, негызым вашталта. Тыге тошто сурт-оралтын «чурийжым» уэмда. Верысе калык шке суртыштым кӧ кузе мошта, могай мастарлыкше уло, туге сылнештара. Теве Геннадий  Аркадьевич Моржанаевым налаш. Тудо пӧртвуйым йошкар калай дене леведын, саварым кӱрен тӱсан профнастил дене печен налын. Пӧрт фронтоным, балконым нарынче, сирень чия дене чиялтен. Урем велысе ош кермычан пырдыжыште мотор лывым сӱретлыме. Кӱртньым левыктен моштышо мастарын кидше шижалтеш. Кажне ийын то угыч чиялта, тӱсым уэмда, то у кидпаша да тӱрлӧ тыгыде скульптур-влакым шындылеш.

… Могай гына янлык-влакын фигурышт уке, южышт тӧршташ ямде улыт, кайыкше ик татлан йымен шинчын. Теве оҥа дене ыштыме кӱварыште  изи модыш гай койшо пырыс, сорла тылзын пытартыш кечынже кас кечын шокшыжым кучен, мален шинчылтеш. Коеш озажым вуча…

   Кажне сурт пелен сад-пакча ужарген шога. Калык пареҥгым кӱнча. Кокымшо киндылан шотлалтше вожсаскам тений ондак лукташ тӱҥалыныт. Кӧ луктын шуктен гын, пошкудыжлан полша. Толмына годым ялысе суртоза-влак: кӧ неле паша деч вара каналташ, южышт ваш-ваш мутым вашталташ – уремыш лектыныт ыле. Канде-ошо тӱсан пӧрт умбачынак палдырна. Теве Анатолий Кудрявцевын суртшо дек лишемына. Анатолий Петрович сулен налме канышыште гынат, шке ялжым, сурт-оралтыжым эре уэмден шога. Ош да шем мончажат уло. Кеҥежым шем мончаш кошташ оҥай. Калыкын йодмыж почеш коҥгам опта. Пошкудыжо-влакат тудын деч почеш огыт код, суртыштым арун кучат. Могай суртоза улмышт пӧртын тӱжвал тӱсшӧ гычак коеш. Анатолийын пелашыже Раисия Леонидовна могай гына пеледышым шынден огыл. Кудывечыште, пакчаште, пӧртыштӧ тӱрлӧ атылашке вераҥдыме. Поснак ош розашт кумылым савыра. Мый чытен шым керт, чылажымат войзен налаш тыршышым. Шижалтеш, пеледыш озаватын кумылжым нӧлта. Мыланем поснак астр, георгин келшышт. Вигак йоча годсо шаршудан жапым ик татлан шарналтет: шыже, школ, свежа чия дене чиялтыме парт… Мом ойлаш, ынде тиде жапым пӧртылташ ок лий. Жап дене тӧр калыкат вашталт толеш. Но пеледышын тӱсыжӧ да пушыжо ӱмырешлан вашталтыде кодыт.

М.СКОБЕЛЕВ  

Снимкыште: 8712 – Гладиолус. 8713 – Ош роза  8714 –Астра – шыжымсе пеледыш. 8715 – Изи ер пеленысе альпийский курык. 8716 – Эх, роза пеледыш 8718 – Георгин 8719 –А.Кудрявцевын кудывечыштыже. 8722 – Тошто пӱкенышке пеледышым вераҥдыме  8727 – А.Кудрявцевын суртшо 8743 – Г.Моржанаевын суртшо 8751 –Пу пӧртымат тыге сылнештараш лиеш

 

Опубликовать в Одноклассники

Добавить комментарий