«Образований» нацпроект
Тунемаш, вияҥаш, ончылно лияш – у йӧн
Сай шинчымашын налын, шочмо кундемышкак пӧртылаш да тудым тӱзаташ кумыл кунам лиеш? Кунам ача-ава, икшыве кугыжаныш велым полышым шижеш, паша вер лиеш… А эшеже школыштат жап дене тӧр шинчымашым пуат гын.
Шернур район Кукнур кыдалаш школышто пытартыш жапыште шагал огыл вашталтыш лийын – леведышымат уэмденыт, ятыр окнам пластиканлан алмаштеныт, школыш пурымаште уэмдыме пӧртончыл ваштареш туныктышо, драматург да просветитель А.Конаковын бюстшым вераҥденыт… А теве у тунемме ий тӱҥалтыште, 6 сентябрьыште, эше ик кугу событий лийын – «Образований» национальный проектын «Современная школа» ужашыж дене келшышын, тыште «Кушмо точко» образовательный рӱдер почылтын. Районышто икымшыже поселкысо 1-ше номеран школышто шукерте огыл ышталтын. А кокымшыжо –муниципальный образований кумдыкышто эн мӱндырнӧ верланыше Кукнур школышто. Тыште кажне кечын 170 наре икшыве шинчымашым налеш. 150 ий жапыште (лӱмгече идалыкше ӱмаште лийын) тӱрлӧ пагытысе выпускник-шамыч могай гына сферыште кугу кӱкшытыш шуын, шке пашашт дене чапым налын огытыл! Ындыжым эшеат кугу ӱшан.
Школ директор С.Конаковын палемдымыж почеш, у рӱдер научный да технический направленийла дене пашам ышташ тӱҥалеш. Тыште химий, физике, биологий предметла дене да ешартыш шинчымашым пуышо занятийлам эртараш йӧн моткочак кумдаҥеш. Тидлан лӱмынак жаплан келшыше лабораторийым, цифровой оборудованийым келыштарыме. А ешартыш образованийым налаш родотетхнике полшаш тӱҥалеш. Чылажымат лӱмынак ямдылыме «Ялозанлык сатун ончыкылык технологшо» ден «Ялозанлыкыште физике» программылан почеш туныкташ палемдыме. Шернур-Кукнур кугорныштак верланыше, Российыште веле огыл кумдан чапланыше «Лукоз» СХП ООО дене вашкыл шотышто договорымат пеҥгыдемден шуктеныт. Озанлыкше гыч Кукнур марте 30 утларак километр лиеш.
Ты событий дене Шернур район администрацийым вуйлатыше А.Кугергин, образований пӧлкам вуйлатыше Т.Лебедева саламленыт. Александр Викторовичын палемдымыж почеш, рӱдер тунемше-влаклан сай качестван шинчымашым налаш, проект да инноваций пашалан тунемаш, усталык шӱлышым вияҥдаш полша.
«Кушмо точко» рӱдерым ышташ федеральный ден республикысе бюджетла гыч 1 миллионат 308 тӱжем теҥге ойыралтын гын, тидлан кабинетлаште ремонтым ышташ муниципальный районын бюджетше гыч 1 миллион утла теҥгем кучылтмо.
Сергей Никандровичын ушештарыме эше фактым палемден кодыде огеш лий. 100 ий ончыч Александр Конаков Царевококшайскысе учительский семинарийыште естествознаний ден химий предметлам туныктен, тидлан посна кабинетым оборудоватлен. Тунамак икшыве-влаклан келге шинчымашым пуымо нерген шонен. Тугеже арам огыл Кукнур школышто тыгай направленийым ойырен налыныт. Ӱшанена, ты тунемме заведенийыште тыршыше туныктышо коллективын эше ик шонымашыже илышыш пурен шуэш – Кукнур школ Александр Федорович Конаков лӱмеш лийшашак!
С.Пехметова.
Снимкылаште:
- «Кушмо точко» рӱдерым почмо годым (шола гыч пурашке): Кукнур ял шотан илем администрацийым вуйлатыше Л.Долгушев, образований пӧлка вуйлатыше Т.Лебедева, район администрацийым вуйлатыше А.Кугергин да школ директор С.Конаков
- 10-11 класслаште тунемше-влак – уна-шамыч дене пырля
Фотом Кукнур кыдалаш школын архивше гыч налме
