Йошкар-Олашке кызытсе жаплан келыштарыме 10 у троллейбусым кондымо. Тыгайже 27 ий жапыште икымше гана лийын.
Троллейбус-влак деч посна «Ола» да «Водоканал» предприятийлашке вакуум дене уремым эрыктыше машинам, куснылшо авторемонт мастерскойым, тореш буренийлан установкым да ГАЗель маркан 2 автомобильым кондымо.
Марий Элым вуйлатыше у технике деч сравоч-шамычым кучыктен, предприятий вуйлатыше да пашазе-влак дене мутланен.
«Таче мемнан пеш вучымо событий – Йошкар-Олаште калыкым шупшыктышо транспорт парк 10 у троллейбус дене пойдаралтын, тидыже 1994 ий деч вара икымше гана. Контракт 240 миллион теҥгеш шуын», – увертарен Александр Евстифеев.
Регион вуйлатыше палемден, олаште илыше да уна-влак кудалыштмышт годым утларакшым тиде транспортым ойырен налыт.
«Троллейбус транспорт» муниципал предприятий тӱҥ перевозчиклан шотлалтеш. Троллейбус дене кажне кечын 30 тӱжем еҥ пайдалана. Тений 7 тылзе жапыште 6 миллион еҥым шупшыктымо, тидыже ӱмашсе деч 22 процентлан шукырак», – ешарен Александр Евстифеев. Тудын мутшо почеш, техникым жапын-жапын уэмдымаш, у технологийым шыҥдарымаш эксплуатацийлан кучылтмо роскотым иземдаш полшат. Тыгак «Троллейбус транспорт» МУП-ын ончыч погынышо кугу парымже, тидлан кӧра предприятийын ончыкылык пӱрымашыже лӱдыкшӧ лийме нерген ушештарен.
«Марий Эл правительстве тудым утарыме шумлык пеш чын пунчалым луктын, Марий Элын бюджетше гыч кӱлеш наре средствам ойырымо, троллейбус паркын таче сай велыш вияҥмыже шижалтеш», – палемден Александр Евстифеев.
Марий Элым вуйлатыше, ик троллейбусыш пурен, салоным, водительын кабиныжым, шкешт коштмо годым нелылыкым шижше еҥ-влаклан могай условий улмым терген ончен.
У машин-влакын электровийым аныклыше улмышт да кондиционерлам вераҥдыме нерген ӱшандарен ойленыт.
Марий Элым в уйлатыше Йошкар-Олан мэржылан у троллейбусышто икмыняр кече яра кудалыштмашым организоватлаш темлен. «Пассажир-влакын тестышт манын лӱмдена», – манын.
Мэр Евгений Маслов регион вуйлатышым тыгай чапле пӧлеклан тауштен.
Марий Элым вуйлатыше илыме вер да коммунал озанлыкысе объект-влакын могай улмыштлан, урем-влакын арулыкышт нерген мутым тарватен. «3 сентябрьыште Марий Элыш РФ чоҥымо паша да ЖКХ министр Ирек Энварович Файзуллин толын коштын. Федерал министр Йошкар-Олан ару да йытыра улмыжым, республикын социал да экономике вияҥмаш шотышто индивидуальный программым илышыш сайын шыҥдарымым палемден. Муниципал предприятий-влаклан ӱшанлын умбакыжат вияҥаш, а оласе калыклан йӧнан илышым тыланем!» – иктешлен Марий Элым вуйлатыше.
«Водоканал» МУП-ын директоржо Рафаиль Киямов Александр Евстифеевлан тореш буренийлан установкын пашам кузе ыштымыжым ончыктен. Палемдыме почеш, у технике грунтовый пашам кугу пайдалык дене, корно полотном шалатыде ышта. «Экономий 30 процентыш шуэш. Тиде техникым вӱд, канализаций, шокшым пуышо, газ, электричестве пуч-влакым шупшмо годым кучылташ лиеш», – каласен Рафаиль Киямов.
Мучашыште Марий Эл вуйлатыше кондымо чыла технике яра шогышаш огыл, республикылан пайдам, а калыклан сай илышым кондышаш манын палемден.
Марий Эл Республикым вуйлатышын
организаций да аналитике виктемжын уверже негызеш
Л.СЕМЕНОВА ямдылен
