ЙОШКАР-ОЛА КУЧЕМЫШТЕ УВЕР ЙОГЫН

ОЛА УРЕМЫШТЕ – ЛУ У ТРОЛЛЕЙБУС

Марий Эл вуйлатыше Александр Евстифеев правительстве пӧртыштӧ Йошкар-Олан мэрже Евгений Маслов дене вашлийын. Пӧртлашке шокшым пуымо, «Троллейбус транспорт» муниципал предприятийын пашаже нерген мутланымаш тарванен.

«Дачыш коштмо пагыт мучашке лишемеш, сандене калыкым ола лишне транспорт дене шупшыктымашын кӱлешлыкше тунарак пӱсӧ огыл. У тунемме ий тӱҥалын, туныктымо паша очно кая, ынде ола кӧргыштӧ калыкым шупшыктымо йодыш ончык лектеш», – каласен вуйлатыше да ты шотышто мэр деч шонымашыжым йодын.

Евгений Масловын мутшо почеш, транспорт кудалыштме кызытсе йогын шке семынже вийныктаралтын, сандене тудым кӱлеш семын виктарен колтыман. «Тендан кӱштымӧ почеш республикын Минтрансше тиде йодышлан кыртмен пижын. Рӱдолаште калыкым тӱҥ шотышто троллейбус-влак шупшыктат, республикын правительствыжын полышыж деч вара«Троллейбус транспорт» предприятий йол ӱмбаке утларак пеҥгыдын шогалын, ондакысе кугу парымже, банкротыш савырнен кертме нерген ятыр искше-влак лийыныт гын, тиде ынде ок лӱдыктӧ», – палемден мэр.

Ола урем мучко кудалыштше троллейбус-влаклан – 30-40 ий. Москва икмыняр тоштемше троллейбусым яра пуэн ыле. Кызыт парк уэмдалтеш, 10 у троллейбусым налаш контрактым пеҥгыдемдыме. Йошкар-Олашке тачысе кечылан 7 троллейбусым кондымо, Минск гыч эше 3-ым вучат. Нуно чылт у, кызытсе жаплан келыштаралтше улыт, салонысо юж вӱдыжтаралтеш да ырыкталтеш. «Олалан лу троллейбус – икымше ошкыл гына, тидым умылыман, – каласен Александр Евстифеев. – Пашам ме умбакыже шуена, пассажир-влакым шупшыктымо йодышым саемдыме шотышто рашемдаш тӱҥалына».

Шокшо игече пытен, йӱдым йӱштӧ шижалтеш. «Оласе калыкым шокшым пуымо йодыш тургыжландара», – палемден Марий Эл вуйлатыше да коммунал озанлыкын шыже-теле жаплан ямдылалтмыж нерген йодын. «Ме  2,5 тӱжем пӧртым ырыкташ 100 наре процентлан ямде улына. Карл Маркс уремыште пуч-влакым вашталтыме кугу паша 10 кече гыч мучашке лишемеш», – вашештен рӱдолан мэрже.

Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен.

Опубликовать в Одноклассники

Добавить комментарий