УВЕР ЙОГЫН ЯЛ ИЛЫШ

Чевер олман ялыште

Кужэҥер район Коклаял мучаште Лидия Егоровна Богданова ден Эрнест Иванович Каменщиков илат.  Коктынат сулен налме канышыште улыт. Эрнест Иванович ӱмыржӧ мучко  «Маяк» совхозын комплексыштыже тыршен: тыглай пашазе, орол, кочегар лийын.  Лидия Егоровна  ончыч Калинин лӱмеш колхозышто, вара  «Маяк» совхозышто 15 ий дояркылан, 12 ий сӧснам, тунам да презым ончышылан тыршен. Лидия Егоровна – кум йочан ава. 19 ияш эргыже Чечня сарыште колен. Эрнест Иванович Кужэҥер район Шинур ялеш шочын-кушкын.

­– 2003 ий марте  тыште сӱмырлен шичше тошто сурт олмо ыле, – палдара Лидия Егоровна.  – Пу пӧртым чыла угыч чоҥымо, вара тудыжымат  уэш ыштыме. Эркын садвечым шындыме. Чылажге иктаж 15  олмапу уло: белый налив, грушовко сорт-влак, тылеч посна сливе, вишне, шем эҥыжвондо кушкыт. Олмапужым Кужэҥерыште да ужалаш кондышо-шамыч деч   налме. Пакчаште пеш шуко пеледышым: флоксым, сальвийым, петунийым, годецийым, тӱрлӧ вербеным, цинийым, бархатцым, георгиным – шындыме. Ончен, шерет ок тем. А  тамле пушыжо  нерген ойлымынат огыл. «Пеледышым, келша да, шындем», – каласыш озавате.

Мланде сай. 35 сотык шемрокышто чыла кушкеш.  Ял мучашысе  пасушто пареҥгым  шындат.  Мыйын мийымем годым эше кӱнчаш тӱҥалын огытыл ыле.

Олмапу йымалне фотом ыштышна. Чевер олмаже мланде ӱмбалне ятыр кия. Тыгак клатыштат коеш. «Олма дене мом ыштеда?» – йодым.

– Компот ден вареньым шолтена,  – озавате вашештыш. –  Пошкудылан, эргылан пуэдем, а мынярже шӱйын пыта. Тений игечыжат телым 35-37 градус  марте йӱштӧ,  а кеҥежым 35 шокшо ыле, но олмапуна-влак теве садак саскаштым пуат.

Ондак нуно ушкалым, кроликым ашненыт гын, ынде – казам, сӧснам, чывым. Эн тошто оралтышт гыч лач пеҥгыде клат кодын, тудым пеш чаткан ыштыме. Негызлан пыштыме кӱжат ондакысак. Ожно пырняжат пеҥгыдырак лийын шол. Оралте  коклаште тошто ӱзгар-влак, вочко койыт – чылажат пеҥгыде. Суртоза-влак нуным эше мыняр жап кучылташ тӱҥалыт– Юмо пала…

М.СКОБЕЛЕВ

Авторын фотожо

Снимкыште: 9572 — Пу пӧрт 9573 -Тошто клат 9590 – Чевер олма  9580 — Л.Богданова ден Э.Каменщиков 

 

Опубликовать в Одноклассники

Добавить комментарий