Марий Турек районышто кумдан палыме предприниматель Н.Морозова Самара олаште эртыше «Перспектива-регион-2017» изи да кокла бизнесым вуйлатыше-шамычын регион-влак кокласе конгрессыштышт лийын.
Нина Сергеевнан кевытше-влак сатулан поян улыт, тушто тыршыше-влакын калыкым кумылын вашлиймышт поснак шижалтеш. Морозова район да республик кӱкшытан тӱрлӧ конкурсышто ик гана веле огыл сеҥышыш лектын. Теве ынде регион-влак кокласе конгрессыш республикна гыч тудак веле миен коштын. 100 утла участник кокла гыч марий кундем гыч мийыше предпринимательын сай кӱкшытыш шумыжым ужде кодын огытыл. Тыге тудо «Регион-влакын шӧртньӧ фондшо» премий дене палемдалтын, тыгак «Пашаште ойыртемалтмылан» медальым кучыктеныт.
Эше ик ешым куандареныт
Медведево районышто тений кумыт да тылечат шукырак йочам ончен куштышо самырык шым еш, федерал программе дене келшышын, илыме йӧнжым саемден кертеш.
Районышто илыше Марина ден Василий Павловмытын ешыш шукерте огыл куан увер толын: нунылан пӧртым чоҥаш але пачерым налаш сертификатым кучыктат. Еш кум эргым ончен кушта. Тудо пачерым Медведево але Руэм посёлкышто налаш палемден. Вет тыште кызыт шагал огыл илыме пӧрт чоҥалтеш. Сертификатын озаже-влакым район администраций вуйлатышын алмаштышыже Н.Шалагин ден образований отдел вуйлатыше Н.Дербенева саламленыт.
Ончыл еҥыштым чапландареныт
У Торъял районысо Кузнеч кундемыште верланыше шым ялын пайремжым иквереш эртареныт.
Ончыч тиде велысе чыла ялым Кузнеч ялсовет ушен шоген гын, шым ий ончыч Чӱксола ял илем кундемыш кусарыме. Кызыт тыште 464 еҥ ила. Пайрем кечын кундемыште ончыч илыше да чапым налше, тыгак кугу сарын пасуштыжо вуйыштым пыштыше-влакын лӱмыштым шарналтеныт, обелиск деке пеледышым пыштеныт. Шочмо кундемлан эреак ӱшанле кодшо, пашаште ойыртемалтше-шамычымат чапландареныт. Тылеч посна тӱрлӧ номинаций дене, мутлан, эн сайын сӧрастарыме пӧрт, мастар кидан еҥ конкурсым эртареныт, пӧлекым кучыктеныт. Кужу жап сайын илыше еш-влакымат палемдаш монден огытыл. Погынышо-влакын кумылыштым тӱрлӧ модыш, фольклор коллектив-влакын муро ден куштымашышт нӧлтеныт.
