КУЛЬТУР ДА ИСКУССТВО ТЕАТР

Марий театрлашкат «Пушкин карт» дене вучат

«Пушкин карт» 14 гыч 22 ияш марте ӱдыр-рвезе-влаклан театрыш, тоштерыш, филармонийыш да моло культур учрежденийыш яра пураш йӧным пуымо нерген газетыштына возымо ыле.

Кодшо арня мучаште М.Шкетан лӱмеш Марий национальный драме ден Марий самырык театр-влакын директорышт Э.Юзыкайн ден А.Бирюков марий телевидений, газет ден журнал-влакын журналистышт дене вашлиймашым эртареныт.

Тушто «Пушкин карт» полшымо дене марий ача-ава, туныктышо-влак икшыве-шамычлан театрыш толаш йӧным ышташ кӱлмӧ нерген мутланеныт.

Чынжымак, яллаште илыше йоча-влакын спектакльлаш билетым налаш чылаж годым оксашт огеш лий докан але тидлан чаманат, сандене кугыжаныш могыр гыч ойырымо карт тидым ышташ йӧным пуа. Кум тӱжем теҥге дене декабрь мучаш марте шагал огыл спектакльым ончаш але вес культур учрежденийыш миен толын кертыт.

Октябрьыште шуко спектакльжым «Пушкин карт» полшымо дене ончаш лиеш, – каласкала Эрик Алексеевич. – Районысо школла гыч тӱшкан ончаш толнешт, но южгунам транспорт шотышто нелылык лектеш. Тыгодым марий театр коллектив-влак шкешт миен да кӱлеш спектакльым намиен кертыт. Тидлан нуно йодмаш дене театрыш лекшаш улыт.

Тиде карт полшымо дене сентябрьыште Марий самырык театрыште руш спектакль-влакым ончаш йӧн уло, а октябрьысе репертуарыш марий постановко-шамычымат пуртенна. Нуным тыглай кечынат, шуматкече ден рушарнянат ончаш лиеш, – палемдыш Александр Васильевич.

Чынжымак, виртуал карт полшымо дене самырык тукым идалык мучко ятыр мероприятийыш миен толын кертеш. Тыгай дене пайдаланаш марий ача-ава, туныктышо-шамычат икшывыштым кумылаҥдат да кажне марий ешыште тудын дене пайдаланаш тӱҥалыт манын, ӱшаныме шуэш.

А.БАЙКОВА

Фотом театрын архивше гыч налме

Опубликовать в Одноклассники

Добавить комментарий