Волжский районысо Руш Шайра ялыште илыше Александр Ильинын садыштыже… олмапу пеледын! Тиде – пӱртӱсын ӧрыктарыше, пеш шуэн вашлиялтше сӱретше, вет шыжым олмапу пеледышыж дене огыл, а саскаж дене куандарышаш.
– Тений олмапуна кана. А шыже велеш эше теве тыге ӧрыктарыш. Кунам пелед шуктен – ом пале, мый тидым кокымшо сентябрьыште садыште сомылкам ыштен коштмем годым чылт вучыдымын ужым. Тыгайже мемнан дене эше лийын огыл ыле, – каласкала суртоза.
Олмапун шыжым пеледмыжлан поснак йоча-шамыч ӧрыныт: кузе тыге, вет биологий дене учебникыште тидын нерген ик мутат уке, саскан кушкылын шошым пеледмыже, шыжым лектышым пуымыж нерген веле ойлалтеш…
Специалист-влак олмапу дене кылдалтше тыгай сынан сӱретым тыге умылтарат:
- Саскам поген налме деч вара кушкылыш ӱяҥдышым утыждене шуко ешарыме.
- Кеҥеж мучаште утыждене шокшо игече шогымылан кӧра кушкыллан стресс лийын, да тудо шукемаш тарванен.
- Олмапушто шошым пеледышлык чумырген огыл.
- Кушкылым осал копшаҥге сусыртен, але тудын укшыжо пудырген.
- Олмапу телым чот кылмен да шошым пеледын кертын огыл, а шыже марте «ырен шуын» да вараш кодын пеледын.
- Олмапу шоҥгемын, але тудым копшаҥге чот локтылын.
Мо гынат, саскалан чумыргаш чаракым ыштен, шыжымсе пеледышым кушкыл гыч кӱрлын налаш темлат.
СМИ-влакын увертарымышт почеш, Марий Элыште, рашемденрак каласаш гын Кужэҥер районысо Йӱледур ялыште да Шернур районысо Кукнур кундемыште, Лоскутово ялыште, 1 сентябрь вашеш сиренят пеледын, шошымсо семын лыҥжак огыл, а верын-верын да тыгыдынрак. Полан ден шуанвондын кокымшо гана пеледмышт нергенат ойлат.
Олмапун шыжым пеледмыжым мыят ик гана веле огыл ужынам: Йошкар-Оласе илыме пӧртем воктене да «Малиновка» сад товариществыште. Пытартышыштыже 2016 ий август мучаште вишнят верын-верын пеледын ыле. М.ИВАНОВА
Снимкыште: Лиана Ильина олмапун шыжым пеледмыжлан моткоч ӧрын
А.Ильинын фотожо