СТАТЬИ

Самырык-влаклан кугыжаныш деч – «Пушкин карте»

2021 ий 1 сентябрь гыч уло Россий мучко самырык-влаклан «Пушкин карте» илышыш пурталташ тӱҥалын. У культур проект нерген Россий Федерацийын президентше Владимир Путин икымше гана тений июнь мучаште увертарен, а стартым тудлан Шинчымаш кечын пуэныт. «Пушкин картым» лӱмынак 14 гыч 22 ияш марте ийготан самырык еҥ-влаклан ыштыме: кажныштыже – 3 тӱжем теҥге, тудым кугыжаныш пыштен. Тиде окса дене Российын кеч-могай кундемыштыже верланыше театрыш, тоштерыш, галерейыш билетым налаш лиеш. Марий Элыште илыше ӱдыр-рвезе-шамычлан тыгай картын озаже лияш мом ыштыман? Тиде да моло йодышлан пӧлеклалтше пресс-конференций республикыштына 2 сентябрьыште эртен. Тушто Марий Эл тӱвыра, савыктыш да калык паша шотышто министр К.Иванов, образований да науко министр Н.Адамова, Информатизаций да связь департаментым вуйлатышын алмаштышыже А.Кадыков, Почта Банкын Марий Элысе да Чувашийысе рӱдерыштым вуйлатыше А.Сорокин лийыныт.

       

Мо тыгай «Пушкин карте»?

Тиде – культур проект. Тудын тӱҥ шонымашыже – кугыжанышын полшымыж дене самырык тукымлан тӱрлӧ тӱвыра мероприятийлаште лияш йӧн ышташ.

 

Кузе тудын озаже лияш?

«Пушкин карте» дене 14 гыч 22 ияш марте ийготан-влак гына пайдаланен кертыт. Тидлан эн ончычак «Госуслуги» сайтыште регистрироватлалтман, рашрак ойлаш гын «учётный запись» манмым ыштыман. Тидын деч вара гаджетыш «Госуслуги. Культура» мобильный приложенийым кусарыман, тудын полшымыж дене виртуальный «Пушкин картым» ыштыман. Кугыжанышын ойырымо 3 тӱжем теҥгеже тушто кийышаш, сандене тетла нимом ыштыман огыл.

Смартфон уке але интернет дене кылдалтше нелылык уло гын, тыгай картым «Почта Банкын» кеч-могай отделенийыштыже ышташ лиеш, тыгак , мутлан, «Госуслуги» сайтыш регистрироватлыме шотышто полышым Шуко функциян рӱдерын пашаеҥже-влак пуэн кертыт.

 

Картыште окса мыняр лиеш?

2021 ийыште кажне самырык еҥлан – кум тӱжем теҥге.

 

Билетым кузе налман?

Тӱвыра организаций-влакын сайтыштышт.

 

Могай тӱвыра мероприятийыш каяш лиеш?

Проектыш кызытеш 1500 тӧнеж ушнен, сандене уло мом ойыраш, нунын коклаште кугыжанышын веле огыл, частныят улыт. Тичмаш афише – «Госуслуги.Культура» приложенийыште, «Культура. РФ» портальыште.

 

От кучылт гын?

Картысе кум тӱжем теҥгем, мутлан, тений 31 декабрь марте кучылтмо огыл гын, тудо вес ийлан ок кусно, а «йӱла».

 

«Пушкин карте» дене билетым вес еҥлан налаш лиеш мо?

Уке. Тудо – именной, сандене билетым тудын озаже гына налын кертеш.

 

Кум тӱжемым наличный семын налаш лиеш мо?

Уке. «Пушкин карте» тыглай банк карте гаяк, но тушеч оксам налаш огеш лий.

 

Кажне мероприятий тергымашым эрта

       – Мемнан элын тӱвыра илышыштыже тиде – кугу событий. 1 сентябрь гыч «Пушкин карте» полшымо дене Российыште илыше 17 миллион гражданлан – от 14 до 22 лет – тӱвыра мероприятийлаш кошташ йӧным ышта. Тышеч мемнан республик гыч тыгай радамыште 60 тӱжем утла самырык еҥ. Ты кӱлешан проектыш республикна гыч 11 кугыжаныш тӧнеж ушнен, нуно чумыр налмаште нылле утла событийым (спектакльым, концертым, ончерым да молым) темленыт да тиде чот кажне кечын кушкын толеш, – каласен республикын тӱвыра, савыктыш да калык паша шотышто министрже К.Иванов.

Тудын мутшо почеш, кажне тӱвыра организацийын  тӱвыра мероприятийжым Россий кӱкшытыштӧ эксперт-влак тергат, молан манаш нуно самырык тукымлан келшыше лийшаш улыт.

– Мутат уке, «Пушкин картым» илышыш пурташ тӱҥалме деч ончыч организаций дене кылдалтше кугу пашам эртарыме да тиде сомылым умбакыже шуена. Республикыштына илыше 60 тӱжем утла самырык еҥ кокла гыч пелыже – школышто тунемше, а молыжо техникумлан студентышт да пашам ыштыше-влак. Сандене тиде проект, чынжымак, кугу. Шонымаш пеш сай, вет, мутлан, шуко шочшан ешыште кажне икшывылан ача-ава тыгай йӧным ыштен ок керт, – каласен образований да науко министр Н.Адамова.

Вашлиймаште «Пушкин карте» дене пайдаланыме нерген Информатизаций да связь департаментым вуйлатышын алмаштышыже А.Кадыков, «Почта Банкын» Марий Элысе да Чувашийысе рӱдерыштым вуйлатыше А.Сорокин каласкаленыт.

                                                                                                            Г.КОЖЕВНИКОВА

 

 

 

Опубликовать в Одноклассники

Добавить комментарий