18-25 августышто Крымысе Межводное селаште эртралтше «Алтын-Майдан» фестиваль-конкурс гыч «Узоры» (вуйлатышыже А.Речкина, концертмейстер – С.Речкин, вокал дене педагог – С.Орлова) йоча образцовый ансамбльын мурышо группыжо гран-при дене пӧртылын.
Фестивальыш элнан 30 регионжо гыч участник-влак чумыргеныт. Нуно мурен, куштен, семӱзгарым шоктен моштымо мастарлыкышт, усталык шӱлышан улмыштым ончыктеныт.
– Кундемна деч ӧрыдыжкӧ лекмекат, ӱдыр-рвезе-влак муро, куштымашышт гоч калыкнан ойыртемжым моткоч сайын почын ончыктат, – куанжым пайла ансамбльым вуйлатыше Ангелина Речкина. – Тений коллективланна – 30 ий. Конкурсышто сеҥен налме гран-при ятыр ий кыртмен пашам ыштымынам ончыкта да умбакыжат тыгак тыршаш тарата.
Фестивальыш Марий тӱвыра рӱдер пеленысе «Сото вий» ансамбль (вуйлатышыже – Э.Петрова) миен да икмыняр номинацийыште икымше вер дене палемдалтын да ик эн виян, профессионал семын мастарлыкым ончыктышо коллектив семын ойыртемалтын, посна приз дене палемдалтын
А.БАЙКОВА.
