28 августышто У Торъял районын шочмо кечыжым палемденыт. Тудлан 3 ий гыч веле 100 ий темеш да тений 97 ий шуын гынат, пайремым кумданак эртареныт. Кеч южо мероприятийже онлайн йӧн дене лийын.
Шочмо кечылан пӧлеклалтше ик мероприятийже 27 августыштак эртен: кугарнян У Торъялысе тӱвыра да каныме рӱдерыште районын эн сай пашаеҥже-влакым саламленыт. Тидыже тыште ынде поро йӱлашке савырнен, молан манаш гын кажне ийын ойыртемалтше пашаеҥ-влаклан муниципал район администрацийын Тауштыман серышыжым да Чап грамотшым кучыктат. Тиде гана нуным район администраций вуйлатыше Василий Блинов ден Марий Эл Кугыжаныш Погынын депутатше, «Первый май» колхозын председательже Аркадий Новиков саламленыт. Пытартышлан тӱвыра да каныме рӱдерын да У Торъялысе Э.Сапаев лӱмеш Йоча искусство школын художественный самодеятельностьшын участникше-влак концертым ончыктеныт.
А пайрем кечын 9 шагат эрдене поселкын рӱдӧ Тыныс площадьыштыже «Шочмо кундем, шочмо кечет дене!» радиоконцерт йоҥген. Тиде жапыштак Рӱдӧ библиотекыште «Села ила – Россий ила» книга выставке почылтын.
Икмыняр жап гыч кумылан-влак У Торъялысе краеведений тоштерыш «Почмо омса» кечыш миен кертыныт.
10 шагатлан «Строитель» стадионышто Скандинав коштмаш дене районын первенствыже лийын. Тушто ӱдырамаш ден пӧръеҥ-влак коклаште сеҥыше-шамычым палемденыт. Ынде нуно 25 сентябрьыште Йошкар-Олаште эртышаш республиканский таҥасымаште районын чапшым аралаш тӱҥалыт.
Тиде жапыштак поселкысо черке воктене районын шочмо кечыжланак пӧлеклалтше «Матерь пречистая, зоренька ясная, храни землю торъяльскую» концерт лийын.
Ты кечынак кумылан-влак Еш-тукым фольклор ансамбль-влакын «Творцы и хранители» регион-влак кокласе IV-ше онлайн-конкурсын трансляцийжым, тусо номинаций-влаклан ямдылыме кидпаша ден тӱрлӧ сийым, «Детки и предки» фотовыставкым, тыгак «Радуга цветов» ден «Игрушечные чудеса» районысо конкурслашке ушнышо-влакын пашаштым да иктешлымашыштым интернетыште ончен кертыныт.
Шахматым йӧратыше-влаклан блиц-турнирыште уш-акылыштым тергаш йӧн пуалтын гын, футболым аклыше-шамыч «Строитель» стадионышто «Первый май» ден Курыкмарий районысо Виловат села гыч «Арсенал» команде-шамычын модмыштым куанен онченыт.
А шочмо кечым палемдымаш кастене рӱдӧ площадьыште эн ончычак пайремлан пӧлеклалтше «Воспевай родимый край» концерт, вараже «Цвети, мой Торъял, я пою о тебе!» видеоконцерт дене мучашлалтын.
Л.Камалетдинова
