Эртыше каныш кечылаште Йошкар-Оласе Тӱвыра да каныме рӱдӧ парклан 80 ий теме. У коронавирусын пандемийжылан кӧра лӱмгече пайрем онлайн йӧн дене эртыш.
Юбилейже вашеш парк оласе калык ден унаже-шамычлан оҥай пӧлекым – Тазалык йолгорным – ямдылен. Тудо В.И.Ленинын памятникше ден «Аттракцион парк» кокласе кожерыште верланен.
Иктаж 100 метр кутышан йолгорным энтузиаст кумылан еҥ-влакым ушышо «Забава» студий келыштарен. Ӱдыр-рвезе-влак чодыра гыч чылаже 20 мешак кож ден пӱнчӧ пӱгыльмым, Мышино ялысе пилораме гыч 30 мешак иман кушкыл шӱмым поген конденыт да теве тыгай йолгорным (снимкыште) ыштеныт.
Тазалык йолгорно йолгопалан сайын вияҥаш, чын формироватлалташ да «маска чапа» чер деч утлаш полша. Тылеч посна айдеме тупшым рыҥ кучаш тунемеш, тидын дене сколиозлан вияҥаш чаракым ышта. Пӱнчӧ да кож пӱгыльман, иман кушкыл шӱман шартыш дене чӱчкыдын кошташ гын, иммунитет пеҥгыдемеш, нерве лыплана, кумыл нӧлталтеш. Тыгай процедур чылалан: йочаланат, кугыеҥланат, илалшыланат моткоч пайдале.
М.ИВАНОВА
Авторын фотожо
