Тений 1 июнь гыч 30 сентябрь марте регион-влак кокласе «Пўртўсым аралыме ушем» мер организаций изи эҥерла, ер ден пўяла серлам эрыктыме шотышто «Российын вўдшӧ» общероссийский акцийым эртара. Тудлан тўҥалтышым РФ-ын Пўртўс поянлык да экологий министерствыже ыштен.
Эртыше ийыште акцийыш Российын 76 регионжо гыч ик миллион утла еҥ ушнен. нуно 5057 вўд йогымо да аралыме верым аруэмденыт. Мероприятий ий еда кумдаҥеш да тушко ушнышо-шамыч ешаралтыт. Ӱмашсе акцийым иктешлыме почеш мемнан республик регион-влак кокласе рейтингыште луымшо верым налын. Марий Элын Экологий лўдыкшыдымылык да пўртўс дене пайдаланыме департаментше йогышо да шинчыше вўд кундемым эрыкташ лекташ кумылан чыла еҥым ўжеш. Тыге ме мландынам яндарракым ыштена, вет чыла кугу паша изи гыч тўҥалеш.
А.АНДРЕЕВ.
