«Марий Эл ГТРК»-н радиотелевизионный передаватлыше рдержын (РТПЦ) телебашньыжым олмыктымылан кӧра Йошкар-Олаште илыше-влак лу кече телевизорым ончымо да икмыняр радиопрограммым колыштмо деч посна кодын кертыт.
РТПЦ-ын директоржын полышкалышыже Е.Загайнова палдарыш:
— 180 метр кӱкшытан телебашньым чиялташ жап шуын. Телевидений ден радиопрограммым транслироватлымым ончылгоч палемдыме почеш 17 гыч 26 июль марте паша кечын 9 гыч 18 шагат марте чарыме лиеш. 22 ден 23 июльышто чыла телеканал программе почешак ыштат. Мут толмашеш, Йошкар-Олаште кок канал – Икымше ден Россий 1 канал – кӱрылтыш деч посна ышташ тӱҥалыт, нуно Советский поселкысо телебашне гыч транслироватлалтыт. Палемдынем: ты кӱрылтыш эфирный вещаний дене пайдаланыше-шамычлан гына лиеш. Кабелян сеть да спутник тарелке гоч телевизорым ончышо да радиом колыштшо-шамыч тыгай йӧндымылыкыш огыт логал.
Йошкар-Олаште илыше-влакым теве мо шот дене шижтарена: башньым чиялтыме годым тале мардеж тарвана гын, чия чӱчалтыш шӱдӧ метр марте тораш шыжалт сеҥа. Сандене ты кундемыште автомашинам шогалтен кодаш, йолын кошташ ок темлалт, а лишыл пӧртлаште илыше-шамычым окнам, балконым петырымаште кучаш йодына.
Палаш оҥай: башньым чиялташ кок тонн наре ошо, ныл тонн йошкар чия да кок тонн растворитель кӱлыт.
А.АНДРЕЕВ.
