УВЕР ЙОГЫН ЯЛ ИЛЫШ

Вияҥме негыз — ончыл йӧн

Ялозанлык да продовольствий министр Ю.Сидыгановын вуйлатыме делегаций «Россий пасун кечыже – 2017» агротехнологий выставкыш миен коштын.

Выставке-форум тиде гана пошкудо Татарстанысе Лаишевский районышто верланыше научно-шымлыше Татар институтын экспериментым эртарыме пасулаштыже эртен. Тушко Марий Эл гыч федерал аграрный водомство, научно-шымлыше да образовательный учреждений пашаеҥ, ялозанлык предприятий вуйлатыше ден специалист, фермер-влак миеныт. Мероприятий конференций, совещаний, «йыргешке ӱстел» семын эртен. Агропромышленный комплекслан кугыжаныш полышым пуымо, АПК-н отрасльже-влакым ончыл йӧн почеш вияҥдыме, шурным поген налме, кушкыл сатун качествыже йодышлам каҥашыме.

Выставке-форумым почшыжла, Россий ялозанлык министр А.Ткачёв тыге каласен:

— Российын ялозанлыкше чынжымак вияҥын толеш, производство кугыт ешаралтеш, сатун качествыже саемеш, вес элласе сатум алмашта. Пытартыш кум ийыште тӱрлӧ элла гыч кочкыш сатум кок пачаш шагалрак конденна. Но ме пырчым шукырак шийын налшаш, аграрный эл улмынам пеҥгыдемдышаш улына.

Выставкыште кушкылым ончен куштымо, вольык озанлык дене кылдалтше технологийым, ялозанлык техникым кумдан ончыктымо. Куатле ялозанлык предприятий-шамычлан кугу лектыш дене пашам ыштыше технике дене пырля изи озанлык-шамычлан технический средствам да оборудованийым ончыкташ кондымо. Тыштак выставкыш толшо-шамыч урлыкаш пырчым, кушкылым аралыме средствам, минерал ӱяҥдышым, техникым да оборудованийым налме шотышто вашкылым ыштеныт. Мероприятийыш чылаже 73 регион гыч 1000 утла еҥ толын. 300 предприятий, тидын шотыштак Марий Эл гычат, шке сатум ончыкташ намиен.

В.Смоленцев.       

Опубликовать в Одноклассники

Добавить комментарий