Пермь кундемысе Суксун район Кызганде ялыште илыше марий ӱдырамаш Галина Панькован шке калыкшым, шочмо вержым йӧратыме, тудым чапландарыме, тӱзатыме верч тыршыме кумылжым ончыктенак кодымо шуэш.
Галина Андреевна 62 ийыш тошкалын. Шке жапыштыже сатучыланат, воспитательланат, верысе клуб вуйлатышыланат ыштен. Кызыт сулен налме канышыште гынат, Пермь олаш социальный работниклан пашам ышташ кудалыштеш. А оксаже тудын суапле поро пашажланат кӱлеш.
Галина эше клубышто пашам ыштымыж годымак тошто марий тӱран вургемым арален кодаш манын, калыкыште погаш тӱҥалын. Тудын эсогыл уныкаже-шамычат марий вургемым пайремлан чият. Уныкаже шотышто, Галинан кум эргыже уло. Кум эрге-шешке 7 уныкам пӧлекленыт. Шукерте огыл кугезе унакажат шочын.
Ковай мер илышыштат чолга. Ты чолгалыкшак ласкан илаш огеш пу. Тудын тарватымыж денак шукерте огыл Сулий ял отышто угыч кумалтышым эртарышт. Теве ынде тудым вес шонымаш авалтен. Марий Элыште марий юмыйӱла дене кылдалтше тунемме курсым пытарымеке, тудым эше ик шонымаш авалтен. Кызганде велне 14 памаш уло, молан нуным Марий Элысе семын тӱзаташ огыл, юмылан пелешташ мийыме вер семынак жаплыме верыш савыраш огыл.
Калыкыштат тидым умылтараш тырша, но кызытеш раш полышым пуышыжо пеш шагалын улыт, мане Галина Андреевна телефон дене мутланыме годым. Кызганде ялысе ик памашыжым тудо шке вийже денак тӱзатен шынден манаш лиеш. Кунгур руш пӧръеҥ-влаклан тудым эрыктыктен, йырже тӱзатен шынден, пеледышымат шынден, Пермь гыч лӱҥгалтышымат, олымбалымат конден. Кызыт ынде памаш шинчам куандара, шкеж деке калыкым шупшеш.
Но Галина Андреевна эше ик памашым тӱзаташ да тудлан лачшымак марий шӱлышым пуаш пижын. Марий манмаштыже, ты кундемыште шым марий ял уло, каласыш тудо. Памашым тӱзатыме пашаже эркын кая, моланже раш – шийвундо кӱлеш, кид вият ок сите. Поснак материалым налаш. Но марий памаш дене палдарыше «Вӱд Ава» аншлагым да кок указательым ӱдырамаш ончылгочак ыштыктен.
Полшаш кумылан-влак лектыт манын шоненак, Галина шке соцкылысе лаштыкыштыже увертарымашымат пуэн. Меат удырамашлан полшаш манын, тидым ушештарена. Марий памашлан у шӱлышым налаш полшынеда гын, кеч шийвундо дене, кеч тыглай кид вий дене Галина Паньковалан полшен кертыда. Телефон номерже тыгай: 89824352196
Светлана Носова
Снимкыште: Галина Панькова – уныкаже-влак дене пырля.
Фотом соцкылысе лаштык гыч налме.
