КУЛЬТУР ДА ИСКУССТВО МАРИЙ ТӰНЯ

«Мурем гын, илем»

«Мурем гын, илем»

Тыге маналтын Марий Элын сулло артистше Р.Данилован лӱмгечыжлан пӧлеклалтше концерт. Калыкын ик эн йӧратыме мурызыжым аклаш то

 

лшо кажне еҥым М.Шкетан лӱмеш Марий кугыжаныш театрын фойештыже Волжский районысо Корамас кундем гыч «Чоткар тукым» ансамбль кинде-шинчал, пура, муро дене вашлийын. Сценыш саламлаш

 лекше-влак Раисия Михайловнан кӧргӧ вий-куатшылан, чолгалыкшылан, ийготым погымо семынат сылне кап-кылым арален кодымыжлан ӧрын,

 кугешнен ойленыт.

А нунышт ятырынак лийыныт: Марий Элын культур, печать да калык-влакын пашашт шотышто министрын икымше алмаштышыже В.Актанаев, калык усталык да культур-каныш паша шотышто шанче-методике рӱдер директорын алмаштышыже А.Рябинин, «Марий Эл» ГТРК-н радио службыжым вуйлатыше В.Кольцов, «Саскавий» марий ӱдырамаш ушемын чолга еҥже-влак, шке жапыште Оньыжалан сайлалтше-шамыч В.Пектеев (муро дене саламлен) ден В.Козлов, чапланыше сӱретче-вла

к З.Лаврентьев ден И.Ямберде… Марий Элын икымше президентше В.Зотин (тудым калык вер гыч кынелын вашлийын) мурызо З.Мамутина дене пырля муро пӧлекым ыштеныт да Р.Данилован вачӱмбакыже йолван шовычым сакеныт. Башкортостан Республик Калтаса район гыч «Ший оҥгыр» ансамбльым вуйлатыше В.Гиздельханова Галина акаж дене эрвел марий ӱдырамашын ожнысо вургемжым пӧлеклышт. Куан кумылым ешареныт Корамас кундемыште шочын-кушшо да кызыт Испанийыште, Сахалиныште илыше землякше-влакын саламлымыштат. Эсогыл ача-аван кудалтен кодымо икшыве, инвалид коляскыште шинчыше Марина Р.Даниловалан, кугу эҥертыш улмыжлан тауштен, пӧлекым кучыктыш.

Марий Элын калык артистше-влак А.Егошин ден М.Мосунов, Марий Элын сулло артистше О.Логинов, РФ ку

льтурын сулло пашаеҥже Е.Каменщиков, Марий Эл культурын сулло пашаеҥже

 С.Белоус, мурызо-шамыч С.Яндукова, А.Речкин (кызыт ЯНАО-со Нижневартовск олаште ила), А.Герасимов («Нью-Трейд» фирмын директоржо), Волжский район гыч Г.Якушева ден А.Жирнова, вате-марий Нина ден Владимир Николаевмыт концерт программым сӧрастараш полшеныт. Самырык музыкант Т.Ямбердова марий сем-влакым ковыж (скрипка) дене мастарын шоктен.

Раисия Михайловна  ныл шагат утла шуйнышо касыштыже эстраде мурылан келшыше икмыняр тувырым, тыгак эрвел марий чиемым алмаштыш. Кунамже мыскарам, кунамже туран пелештымыжым калык умылен вашлие.

С.Пехметова.

Снимкыште: Марий Элын сулло артистше Р.Данилова.

Авторын фотожо.

Опубликовать в Одноклассники

Добавить комментарий