Ноябрь марте пуаш лиеш

Йочам школыш ямдылашлан 6 гыч 18 ияш марте икшыве-влаклан 10 тӱжем теҥге единовременный выплатым налаш але марте Марий Элыште ПФР-ын территориальный органлашкыже 76 тӱжемат 112 йоча шотышто 54 тӱжемат 89 йодмаш пурен.

Ача-ава-влак йодмашым кеҥеж марте пуэн огыт шукто гынат, тургыжланышаш уке. Тидым нуно 1 ноябрь марте ыштен кертыт.

Йодмашым кугыжаныш услуго портал гоч, тыгак  Пенсий фондын чыла клиент службыштыжо пуаш лиеш. Тылеч вара вич паша кечыште йодмаш шотышто решенийым луктыт. Ты жапыште ПФР-ын территориальный органже-влак ача-ава-шамычын пуымо уверыштым тергат, выплатым налаш правашт улмо-уке шотышто межведомственный запросым ыштат. Выплате тӱлалтшаш огыл гын, нунылан решенийым лукмо деч вара ик паша кече жапыште тидын нерген увертарат. А окса тӱлалтшаш манын рашемдат гын, йодмашым ончымеке, оксам счетыш 3 паша кече жапыште, но 16 август деч ончыч огыл, колтат.

Л.Камалетдинова