14 гыч 18 ияш марте ийготшудымо рвезе ден ӱдыр-влаклан тунемме деч яра жаплан, поснак кеҥеж пагытлан, пашам мумаш «2013-2020 ийлан Марий Элысе калыклан пашам ситарымаш» кугыжаныш программын ик тӱҥ ужашыжлан шотлалтеш. Ты программе самырык-шамычым пашаш ушаш йєным пуа, тыгак икшывым тазыла корно гыч кораҥдаш, преступленийым ыштыме деч арален налаш полша.
Ӱдыр-рвезе-шамыч коклаште шукыштын шкеныштынат южым чумен перныл коштмышт ок шо. Тений пашаверым темлыше органлаш вуешшудымо 630 утла самырык еҥ пашам муын пуаш йодын толын, нунын кокла гыч нылытынже ийготшудымо-влакын пашашт да нунын праваштым аралыме шотышо комиссийын учетыштыжо шотлалтыт. Нунылан полшаш манын, пашавер рӱдер ден пашам пуышо-шамыч дене 56 договорым ыштеныт, тыге жаплан тыршаш 680 верым ямдылыме лийын, палемдат Марий Элын паша да калыклан паша вер департаментыштыже.
Договор дене келшышын, ийготшудымо 580 утла самырык еҥым пашаш вераҥдыме. Нунын кокла гыч 140 наре подросткыжын илышышт куштылгыжак огыл. 90 утла рвезе ден ӱдыр нужналан шотлалтше, кудытын тичмаш огыл, 32 икшыве шуко йочан ешла гыч, кумытын уда койышыштлан кєра учетыш шогалтыме, визытын тулык, ача-ава полыш деч посна кодшо улыт. Сандене нунылан кеч изи оксажат пеш кӱлешан. Тазалыкыштлан лӱдыкшыдымылык укем шотыш налын, ача-авашт дене мутланен келшен, нуно коло наре специальность дене тыршат.
Самырык-влаклан паша вер уло. Тений республикыште 746 еҥым вераҥдаш палемдыме. Нунылан материальный полыш семын тӱлаш 637,2 тӱжем теҥге ойыралтын. Подростко-шамычлан профориентаций паша кумдан эртаралтеш. Тачысе кечылан тудын дене 2,3 тӱжем рвезе ден ӱдырым авалтыме.
А.АНДРЕЕВ.
Снимкыште: паша уло, тыршаш кумылет веле лийже.
(Марий Элын паша да калыклан паша вер департаментше гыч налме фото).
