Марий Эл Республик вуйлатыше Козьмодемьянскыште кужун чоҥалтше объект-влакым шотыш кондаш кӱштен.
Верысе кучем ончылно тудо задачым шынден – стадионым мучаш марте чоҥен шукташ да чоҥалтше пӧртын кум озажын праваштым арален налаш. Тидын шотыштак нине йодыш дене ответственный еҥ-влак дене республик правительствыште А.Евстифеев совещанийым эртарен.
Козьмодемьянск олан мэрже Михаил Козлов мучаш марте чоҥен шуктыдымо объект, ыштыме паша, тачысе кечылан могай ситуаций нерген уверым пуэн.
«Конфликтше теве молан лектын. 3 миллион 600 тӱжем теҥгелан налшым муын кертын огынал, а объектым аклыме деч вара акшым кум пачаш кугемденыт. Кушто логике? Тидак задачым илышыш пурташ чаракым ышта. Тачысе кечылан Марий Элыштыжат ик тыгай объект гына кодын. Нуно ондалалтше дольщик-влак огыл, а предпрниматель пашам шуктышо физический лица-шамыч улыт. Кугурак парышым ыштен налаш манын, объектым чоҥаш оксам луктын пыштеныт. Сандене лишыл жапыште адекватный оценкым пуыман да моло кӱлеш ошкылым ыштыман, — каласен регион вуйлатыше.
Вес кужун чоҥалтше объектше – Козьмодемьянскысе «Юбилейный» стадион. Молодёжный политике, спорт да туризм министр Лидия Батюкован ойлымыж почеш, ты спорт полатлан у сыным пуымо паша икмыняр кужыт дене вораҥеш. 2019 ийыште, уэмдыме пашан икымше этапше шукталтын. Тушто шуко функциян площадкым ыштыме. Телым тудо катоклан, а кеҥежым бастектболла модаш келыштарыме. Тушко асфальтым шарыме, йыржым авырен налме, оҥган баскетбол щит-влакым шогалтыме. Кодшо ийын апрельыште кокымшо этапыш куснымо. Футбол пасум да куржталтме корным ыштышаш улыт улмаш. Закон дене келшышын администраций подрядчикым ойырен налаш аукционым эртарен. Пашам «Энерготехмонтаж–Холдинг» Москосо акционер обществылан ӱшаныеныт. Ончыч фирмак ГТО площадкыште спорт оборудованийым рончен, пушеҥгым руэн кораҥден. Варажым объектыште футбол пасулан мландым тӧремден, куржталме корнылан резине леведышым шарен. Тыгак кодшо ийынак электротулым шупшмо, понар меҥге-влакым шогалтыме. Но подрядчик шке пашажым мучаш марте ончылгоч палемдыме жаплан шуктен огыл. Сандене уэмдыме пашан кокымшо кужытшым августышто мучашлен кертме огыл. Прокруатурымат ушаш логалын, суд гоч подрядчикым мут кучаш шогалташ да пашам мучашлыкташ логалын.
Тений 29 майыште стадионым уэмден олмыктымо пашан кумшо этапше тӱҥалын. Но тачысе кече марте подрядчик ситыдымашым кораҥден да пашам умбакыже шуен огыл. Санденак оласе администраций, подрядный организаций-влак дене пашам мучашлаш манын, вияш ойпидышым ыштен. Тудын почеш футбол пасум да куржталме корным 30 июль марте ыштен шуктышаш улыт. Александр Евстифеев министрлан ты срокым шуктымым тергашак кӱштен.
Совещанийыште тыгак Йошкар-Оласе «Восточный» микрорайонышто 1100 верлан у школым чоҥымо нерген мутланеныт. РФ Просвещений министерстве ты объектым чоҥаш республикын йодмыж почеш субсидийым пуаш лийын. Образований да науко министр Наталья Адамован ойлымыж почеш, у школым чоҥаш проект документаций ямде, экспертизым эртыме.
Марий Эл Республик вуйлатышын организаций да аналитике виктемжын уверже негызеш С.Носова ямдылен.
