Республикын Тӱвыра, савыктыш да калык паша шотышто министржын алмаштышыже Галина Ширяева сулен налме канышыш лекме амал дене шке кумылын паша верже гыч каен.
Ты должностьышто Галина Степановна 2001 ий гыч пашам ыштен. Тудо наций да конфессий-влак кокласе кылым вияҥдыме шотышто йодышлан, тыгак шанче организаций, архив-влакын пашаштлан вуйын шоген.
1 июль гыч министрын алмаштышыжлан Игорь Садовиным палемденыт.
Игорь Геннадьевич 2014 ий гыч культур министерствыште наций да конфессий-влак кокласе кыл пӧлкан начальникше лийын.
Ведомствын пресс-службыжын палемдымыж почеш, у должностьышто тудо наций да конфессий-влак кокласе кыл аланыште кугыжаныш политикым вияҥдыме, национальный культурым, калык усталыкым аралыме да вияҥден колтымо шотышто вуйын шогаш, тыгак шанче учреждений ден архив-влакын пашаштым виктарен колташ полшаш тӱҥалеш.
А.БАЙКОВА
