Сургут марий ушем Россий Президентын грантшылан тенийсе кокымшо конкурсыштыжат сеҥышыш лектын.
Икымше конкурсыштыжо тудын кок проектше палемдалтын, кок сай шонымашым илышыш шыҥдараш шийвундо ойыралтын. Черетан сеҥымаш тусо марий-влакым эшеат чот куандарен, молан манаш гын участник-влак моткоч шукын лийыныт. Туге гынат нуно ойыртемалтыныт да эше ик у шонымашлан вер гыч тарванаш окса полышым налын кертыныт.
Проектышт «ЗнайЭТнО» маналтеш. Тудо Российыште илыше тӱрлӧ калыкын этнический символжо-влакым ушышо ӱстембал модыш серийым ыштымашке виктаралтын. Модыш дене тӱрлӧ ийготан-влак модын кертыт. Кажне комплект модышышто ешартыш семын дизайнер деч этномаске-влак лийыт. Сургут марий-влакын чолга активисткыже Раисия Сунгурован ойлымыж почеш, ты проектым Сургут ола кумдыкышто верысе администрацийын субсидийже полшымо дене илышыш пурташ пижыныт улмаш. А ынде шонымашым мучаш марте шукташ сеҥен налме президент грант полшышаш. Модышым уэмдат. 500 наре комплектым савыктат да ХМАО-Югра кумдыкышто, тӱрлӧ олаште турнир-влакым эртараш палемденыт.
С.Носова