«Таврида» Россий форум шке пашажым тӱҥалын. 1-6 июньышто «Мы Вместе» икымше смене эртен. Марий Эл гыч тушко И.С.Палантай лӱмеш тӱвыра да сымыктыш колледжын студентше Кристина Пуртова миен коштын.
«Ончыч концертла дене вес кундемлаш кошташ логалын гынат, республик деч пеш торашкыже кайыме огыл. А «Таврида» икымше гана теҥыз деке миен толаш, Крымым ужаш йӧным пуэн. Самолёт денжат ончыч чоҥештен омыл ыле. Тушко логалмем пеш кугу куанлан шотлем.
Форум программе пеш тӱвыргӧ лийын. Кажне кечын могай-гынат шоу, концерт, кумдан палыме спикер-влак дене вашлиймаш. Малашат жап шагал лийын: кас тулото воктене эртен, а йӱдым – дискотеке.
Тушко талантан самырык-влак уло Россий гыч погыненыт. Икте мура, весе семӱзгар дене шокта, кумшо – кушта. Чылан уста, весела, поро улыт.
Тыгак кажне кечын тунеммаш-влак эртеныт. Ончыч иктажым ышташ таратыше (мотивационный) лекцийла лийыныт. Спикер-влак шке моштымыштым ончыктеныт, у шонымашлан кумылаҥденыт. Вара практике пашалам ыштыктеныт. Тудыжо тӱрлӧ лийын. Мый музык аланыш ушненам. Тушто вокал дене мастер класс-влакым эртареныт, логарым лывырташ полшышо упражненийлам ончыктеныт.
Мо ыш келшыже – тиде йӱр. Теҥыз деке толмеке йӱштылаш пураш лийдыме ойгандарыш», – палдарыш Килемар посёлко гыч ӱдыр.
О.МОШКИНА
