ЛӰМГЕЧЕ ПАТЫРЛЫК СПОРТ ТАЗАЛЫК ТЕАТР

Спортсмен, физкультурник, артист, журналист…

 

5 июньышто Волжский районысо Мӱшыл ер воктене (Руш Шайра)  курыкышто куржталме дене Россий гран-прин черетан этапше лийын. Тудо  тений Марий Самырык театр ден «Кугарня» газетлан 30 ий теммылан пєлеклалтын, манаш лиеш. Мероприятийым Волжский район, верысе администраций, театр пашаеҥ-шамыч да куржталше-влакын клубышт эртареныт.

Куржталмаште профессионал-спортсмен-влак дене пырля тунемшат, кумылан да куржталаш йӧратыше тыглай еҥат  регионнан тӱрлӧ кундемже гыч чумыргеныт. Нунылан, ийготым шотыш налын,  посна тӱшка дене старт пуалтын.

Верысе организатор-влакын уна-шамычым саламлымышт деч вара икымше забег Самырык театрыште да «Кугарня» газетыште тыршыше-шамычлан лийын. Нунышт тӱшкан курыкышкыла чымалтыч. Мутат уке, ямдылалтме деч посна нелылык шижалтын, но, палемдыме корным куржын эртен, чыланат финишыш толын шуыныт.

Чыла кокла гыч Самырык театрын артистше Андрей Алексеев финишыш эн ончыч куржын толын.  

– Тыгай таҥасымаште икымше гана куржталам. Курыкышто моткоч неле ыле. Шкем тергенам. Такшым кечым коден, ик шагат шкан куржталашак тыршем. Тиде капкылым, кумылым лывырташ моткоч кӱлешан, шонем, – мане тудо. – Тыгак верысе пӱртӱсын моторлыкшым палемдыме шуэш. Самырык театрлан, тыгак «Кугарня» газетлан – 30 ий. Тыгай пайремлан куржталмашке ушнаш – пиал.

Тиде мероприятийым таза илыш-йӱлам кучымо шотышто сай тӱҥалтыш семын палемдыман. Артистат шкешотан спортсмен-физкультурник лийшаш. Таза айдемын кеч-куштат чыла пашаже сайын ворана.

Сергей Мамаев, Марий Элын калык артистше:

– Мурен куштымаш дене таҥастарымаште тиде трассе «ерунда». Калык шуко, игече сай. Самырык театрыште тыршыше-влакым тыгайыш лекташ кумылаҥмыштлан моткоч кугу тау. Такшым пӱртӱсыштӧ шукырак лияш, тушко чучкыдынрак лекташ кӱлеш. Таче шонымашемат изиш вашталте ала-мо… Таза илыш-йӱлам кучаш кўлеш. Эртышым, школышто тунеммем шарналтышым. Такшым мый 4 класс гыч 11-ше классла марте туризм дене пеҥгыде кылым кученам. Сандене куржталме шотышто негыз уло манын кертам. Пайрем дене !

 

Олег Иркабаев, Самырык театрын художественный вуйлатышыже:

– Трассе нойыктарыш ала-мо… Иктаж 15 ий куржталынжат омыл. Тыште икымше гана улам.  Самырык театрлан 30 ий теммылан пӧлеклалтше спорт мероприятийыште кеч нушкын да толын шуам, шоналтенам ыле, но шӱлешташыже логале. Курыкыш кӱзаш неле. Такшым спорт ден культур кылдалтше лийшаш улыт, вет капкыл да чон культур икте-весе дене пеҥгыдын кылдалтшаш улыт. Капкыл шуаралтше, таза гын, тудо сай шижмаш дене ила. Физкульт, ура!

Любовь Купсольцева, Марий Элын сулло артистше:

– Неле, но тидым сеҥаш тунемынна. Илышат тыгай: ала-кушто куштылго, тєр, ала-куштыжо – нелырак. Мый икымше кече гычак Марий Самырык театрыште пашам ыштем. Сандене палемдыме ик  километрым куржде шым чыте. Пайрем дене!

Эдуард Иманаев, «Кугарня» газет» кугыжаныш унитарный казна предприятийын директоржо:

– Мотор таҥасымаш эртаралте. Пеш келшыш. Кумыл нӧлталтше. Марий самырык театрын, «Кугарня» газетын коллективышт дене кузе моторын илаш лиймым ончыктышна. 30 ий амал дене тӱрлӧ мероприятий эрта. Адакшым тыглаят калык дене вашлияш тыршена.  

Спортсмен-влак коклаште эн кужу 10 километр кужытышто (Мўшыл йыр вич гана куржын эртеныт) 1-ше верыш Сергей Семёнов (Медведево районын эргыже), 2-шо верыш Шернур район гыч Алексей Ахтямов, 3-шо верыш Морко район гыч Алексей Максимов лектыныт. ™дырамаш-влак кокла гыч Анастасия Максимова, Александра Кичинова, Зинаида Якимова ойыртемалтыныт. Эн самырык семын 2015 ийыште шочшо Даниил Моисеевым палемденыт.

Игече ты кечын кажныжым куандарен. Южышт лач таҥасымаште вийым тергаш толыныт гын, шукыштлан ты кече сылне пӱртӱс коклаште, мотор вершӧрыштӧ пайдале каныш, икте-весым ужын кутырымо семын кужу жаплан шарнымашеш кодеш.

Е.ЭШКИНИНА.

Опубликовать в Одноклассники

Добавить комментарий