Йошкар-Олаште «Пеледыш пайрем» регион-влак кокласе тӱвыра фестиваль тений 19 июньышто лийшаш ыле.
Но Марий Эл вуйлатышын указше почеш, неле чер эпидемийлан кӧра республикыште утларак ямде улмо режимым 5 июль марте шуйымо. Сандене Йошкар-Олаште «Пеледыш пайрем», «Сабантуй» пайрем-влак да Курыкмарий велне «Пеледыш айо» муро фестиваль кызытеш раш огыл пагытлан кусаралтыт.
Моло кундемыште марий пайрем-влакым эртарыме шотышо могайрак сӱретым ончалына.
Одо кундемысе марий-влак Пеледыш пайремым «Семык» семын палемдат. Тений тудо республик кӱкшытыштӧ Каракулин район Пыргынде ялыште 12 июньышто 25-ше гана эртышаш.
Семыкше тений 16-18 июньлан толеш. 16 — ышто – Сорта чӱктыш кече. Семык йӱдым мончаш олтат. 17-шыште – Изи пел кон кече – Семыкын уштен кумалме кечыже. Южо марий Сорта чӱктышым тиде кечын эртарат. 18-шыштыже – Лышташ кугарня, Семыкын модын-пайремлен эртарыме кечыже.
Татарстан кундемыште тыгак Семык 19 июньышто Актаныш район Йӱштӧ Памаш ялыште лийшаш.
Урал марий-влакын Свердловск область кӱкшытыштӧ эртаралтше пайремышт «Ага-пайрем» маналтеш. Тений тудым Ачит оласе округыш пурышо Марий Карши ялыште 5 июньышто палемденыт.
Санкт-Петербург ден Ленинград областьыште илыше марий-шамычат шке йӱлаштым арален да шуэн толыт. Пеледыш пайремым нуно тений индешымше гана 13 июньышто палемдаш ямдылалтыт. Тудо Всеволжск оласе «Приютино» усадьбыште лиеш. Тушко Марий Эл гычат уна-влакым ӱжыныт.
С.Носова
