Вашталтыш шумлык
Кеҥеж йомартле, тыгак чылалан ак кушмо пагыт
Российыште илыше калыкым 1 июль гыч адак шуко вашталтыш вуча. Ончычсо семынак сайжат, удажат уло.
Пашалан тўлымӧ эн изи пашадар кугыт (МРОТ) 300 теҥгелан ешаралтеш да 7800 теҥгеш шуэш. Тидын дене келшышын, налог, тўрлӧ тулымаш да сбор, южо тўрлӧ штраф кугемыт. РФ-ын Паша кодексше почеш пашам пуышо пашаеҥлан тылзаш пашадарым тылеч ўлыкшым тўлышаш огыл.
Июльышто, уда йўлаш савырныме семын, коммунальный услугылан ак кўза. Акше кушкеш, услугым пуымо йӧнжӧ начарештеш. «Комунальщик-влак», пашаштым саемдаш уто роскотым ыштыде, калык деч кугурак оксам йождараш гына йӧным кычалыт манашат лиеш. Пачерым ырыктымылан, шокшо ден йўштӧ вўдлан, газ ден туллан, канализацийым кучымылан оксам шукырак луктын пышташ перна.
Шуматкече гыч электрон больничный илышыш пурталтеш. Кагазан больничный листат эше аралалт кодеш. Кокытшат кучылталташ тўҥалеш. Минтрудышто каласеныт: кагазан бланк деч кеч изиш кораҥмат 12 миллион теҥге бюджет оксам аныклен кода.
ГИБДД июль гыч кагазан ПТС-ым пуымым йӧршеш чарна. Транспорт средствылан паспортым тўрыс электронныйыш кусарат. Тушеч автомобильын ончычсо озаже, техникым кунам олмыктымо да техобслуживанийым эртымыж нерген чыла пален налаш лиеш.
1 июль гыч бюджет учрежденийлаште да предприятийлаште ыштыше чыла пашаеҥ, тыгак икымше гана пенсийым налаш мийыше-влак «Мир» тўлымӧ системын картшым налыт. Талук гыч, 2018 ий 1 июльлан, «Мир» карт чыла бюджет пашаеҥлан пуымо лиеш. Тўрыснекше ты картыш 2020 ий 1 июльлан куснен шуаш палемдалтеш. Тылеч посна ты кече гыч «Мир» карт дене Российысе чыла банкын отделенийлаштышт да банкоматлаштышт пайдаланаш лиеш. Кредит организаций-влак ты жаплан карт дене пашам ышташ чыла устройствыштым ямдылен шуктышаш улыт ыле.
А.АНДРЕЕВ.
