ЕШ ДА ИКШЫВЕ

Йочалан – пайдале каныш, ача-авалан – полыш

Россий президентын да правительствын кӱштымашышт почеш, элыштына илыше икшыве-влак кеҥеж жапыште йоча лагерьыште канен да тазалыкыштым пеҥгыдемден кертышт манын, путёвкым налаш полшышо программым – йоча кешбэкым – илышыш пурташ тӱҥалме. Тудлан кӧра ача-ава-влак путёвкым налаш кучылтмо оксаштым (50 процентым) мӧҥгеш пӧртылтен кертыт. Тиде программе дене путёвкым 25 май гыч 31 август марте налаш лиеш. Каласыман, Марий Элым вуйлатыше Александр Евстифеев йоча канышлан ешартыш средствам ойырен.

         Тиде направлений дене паша кӱлеш семын вораныже манын, Марий Элыште межведомственный комиссий уло, но лишыл кечылаште эше йоча-влакын тазалыкыштым пеҥгыдемдыме кеҥежымсе кампаний дене кылдалтше йодышым решатлыше оперативный штабым чумырымо. Тидын нерген 25 майыште Марий Эл Правительстве председательын икымше алмаштышыже Михаил Васютин верысе журналист-влаклан эртарыме пресс-конференцийыште каласен.

Йоча кешбек программе дене кузе пайдаланыман? Мо шотышто тӱткӧ лийман?

  1. Мутат уке, ача-ава-влак эн ончычак лагерьым ойырат. Тидым ыштыме годым палыман: йоча кешбек дене пайдалаш шонеда гын, тиде каныме вер обязательно ты программын участникше лийшаш. Тидым путёвкым налмекат тергыман: туроператорын але агрегаторын сайтыштыже налме документыште программыш пуртымо нерген палдарыше маркировко лийшаш. Программыште кугыжанышат, коммерческий лагерят участвоватлат, но стационарный гына. Палатке, оласе але кечывалымсе лагерь-влак тушко пурталтын огытыл.
  2. Путёвкылан оксам тӱлымӧ годым «Мир» картым (тудо ача-аван веле огыл, кеч-кӧн лийын кертеш) гына кучылташ лиеш – вич кече жапыште пел акшым (но 20 тӱжем теҥге деч шуко огыл) тушкак пӧртылтат. Вес карте полшымо дене тидым ыштеда гын, путёвкын пел акшым пӧртылтен огыда керт.
  3. Программын мыняр участникше уло, нуно мом темлат – мирпутешествий.рф сайтыш пурен пален налаш лиеш. Лагерьын, туроператорын але агрегаторын темлымашыжым «Йоча лагерь-влак» посна лончышто пален налаш, ойыраш да тӱлаш лиеш. Кызыт тиде спискыш вашталтыш-влак пурталтыт, но 5 июнь марте ямде лиеш да савыкталтеш.
  4. Умылыдымаш лектын? «Шокшо линийыш» 8 800 200 34 11 ( 1) йыҥгыртыза але мирпутешествий.рф сайтын чатыштыже йодышым пуаш лиеш.
  5. Йоча канышлан льготылан сертификат уло? Ида тургыжлане, тыгай годымат кешбек дене пайдаланаш лиеш. Тыгодым сертификатлан ешарен тӱлымӧ окса гыч пелыже пӧртылталтшаш. Мутлан, путёвко 20 тӱжем теҥгеаш, ешлан сертификатым 10 тӱжем теҥгелан пуэныт, ача-ава кӱсенже гыч эше тынарак луктын пышта. Тидым тудо «Мир» карте полшымо дене ышта гын, шке кӱсен гыч луктын пыштыме 10 тӱжем теҥге гыч пелыже – 5 тӱжем теҥге (50 процент) ты картышкак пӧртылтат.
  6. Йочан ийготшо шотышто чарак уке, тыгак тудо ик сменым гына огыл – икмынярым канен кертеш.
  7. Ик карте «Мир» дене икмыняр путёвкылан оксам тӱлаш лиеш. Мутлан, тендан кум икшыве уло, кумыньыштланат путёвкым налаш оксам тӱленда – кешбекым кажне путёвкылан налшаш улыда.
  8. Путёвкым налында, но йочам лагерьыш ынеда колто? Шонымаш вашталтын гынат, тургыжланыман огыл: окса тыгак мӧҥгеш пӧртылталтшаш.

 

Путёвкым шукертак налме. Мом ышташ?

          Йоча кешбек программе тиде кечылаште гына илышыш пурташ тӱҥалыныт. А южо ача-ава путёвкым 25 май марте налын шуктен. Тудын пел акшым пӧртылташ лиеш мо?

          Пресс-конференцийыште тиде йодышлан Марий Эл образований да науко министр Наталья Адамова вашештен:

          – Республикысе йоча лагерьлаш тӱжем наре путёвкым ача-ава-шамыч налыныт. Тӱҥ шотышто – Володя Дубин лӱмеш лагерьыш, «Кооператорыш».

Тургыжланыман огыл. Кызыт путёвкылан кучылтмо оксан пел акшым пӧртылтымӧ механизмым ямдылыме.

25 май марте путёвкын акшым пӧртылташ манын теве мом ыштыман:   

– Йочан лагерьыште канен толмыж деч вара интернет гоч «Госуслуги» порталыш пурыман, тушто путёвкын пел акшым пӧртылтымӧ вкладкым муман (кызыт тудо уке, 15 июнь гыч гына ышталтеш!);

–  вара йодмашым возыман (тушто шкен, йочан данныйжым пуртыман, тыгак лагерьым, путёвкым могай йӧн дене налмым, «Мир» картын реквизитшым ончыктыман, чылажымат документ дене пеҥгыдемдыман).

 Документым кок арня жапыштек тергышаш улыт, тидын деч вара гына путёвкын пел акшым «Мир» картыш пӧртылтат. Кешбек программе семынак ты механизм 15 сентябрь марте пашам ышта, сандене палемдыме жап марте тидым ыштен шуктыман. Но пытартыш смене – август мучаште. Ида тургыжлане: тыгай годым йодмашым 15 октябрь марте пуэн шуктыман.

– Тӱҥжӧ – йоча-влаклан кеҥежым каныме да тазалыкым пеҥгыдемдыме лагерьлаште лияш йӧным ышташ, льготдымо ача-ава-влаклан полышым пуаш, – палемден пресс-конференцийыште Михаил Васютин.

Г.КОЖЕВНИКОВА

Д.Речкинын фотожо

Опубликовать в Одноклассники

Добавить комментарий