КУЛЬТУР ДА ИСКУССТВО

«Сценыште чонлан каньыле, вийым налмыла чучеш»

Кугурак класслаште тунемме годым кажне самырык еҥым ик йодыш тыргыжланадара: «Кушко умбакыже тунемаш каяш?» Ты шотышто У Торъял районысо Овалже ялын эргыже Иван Соловьёват тӱрлын шонкален. Школышкышт М.Шкетан лӱмеш Марий кугыжаныш драме театрын тӱҥ режиссержо Роман Алексеев ден режиссер Василий Домрачев миеныт, 11-ше классыште тунемше-влаклан Моско олаште В.Щепкин лӱмеш кӱшыл театр училищыш марий группым чумырымо, артистын илышыже да пашаже нерген каласкаленыт. Колыштшо-влак коклаште Иванат лийын.

— Тудо жаплан мый такше историй але юридический факультетыш тунемаш каяш шоненам, — 17 ияш годсыжым шарналта рвезе. — Но тыгодым театр гыч мийыше уна-влакынат ойыштым шотыш налынам, вет чонышто артист койышым шижынам: гитарым шокташ йӧратем. Сценыште мурымо годым чонлан каньыле, вийым налмыла чучеш.

Икмыняр жап шонен-вискалымеке, Иван Москош тунемаш каяш шонен пышта. Икымше, кокымшо, кумшо турымат эрта. «Иван, саламлена Щепкин лӱмеш училищын студент радамышкыже пурымет дене!» — тыгай ойым колмекыже веле Москосо вузыш тунемаш пурен кертмыжлан ӱшанымыжла чучеш.

И.Соловьёв У Торъял районышто шочын-кушшо да кызыт М.Шкетан лӱмеш драмтеатрыште пашам ыштыше Иван Смирновын, Светлана Строганован, Олег Кузьминыхын  пашаштым онченат, нунын корнышт дене каяш кумылаҥын.

Ялысе рвезе элнан рӱдолаштыже, мутат уке, тӱҥалтыште шочмо кундемже верч йокрокланен.

— Москошто огыл, Йошкар-Олаштыжат икмыняр гана веле лийынам. Йырваш рушла мутланеныт. Туныктышо Елена Валерьевна Лазарева дене веле шочмо йылме дене мутланаш йӧн лийын. Весат мыйым ӧрыктарен: артистлан тунемаш тынар йӧсӧ манын шоненат омыл: 9 шагат эр гыч 9 шагат кас марте эре училищыште лийман. А эрлалан кажне педагогын пуымо мӧҥгысӧ пашам ыштен шуктыман, — ойла Иван. — Икманаш, артист паша чытышым йодеш, сандене тунемме годым шуко ямдылалташ, шкем шке вияҥдаш тыршыме.

Кӱшыл театр училищым тунем лекмеке, 14 самырык еҥ М.Шкетан лӱмеш Марий театрыш пашам ышташ толын. Кажныже чолга, ойыртемалтше. А теве  Иван Соловьёв гитарым шокташ моткоч кертеш, сылне йӱкшӧ дене тӱрлӧ мероприятийым сӧрастара, кумылым нӧлта.  

— Такшым изи годымат муренам. Шымше классыште тунеммем годым «Городской романс» конкурсышто мастарлыкым ончыктенам, сеҥыше радамышкат лектынам ыле. Кушмо семын, йӱк вашталтме пагытыште, мурымым чарненам, чылт комбынла шоктен, — воштылеш самырык артист. — А 10-шо классыште тунемме годым изамын  гитрым шоктымыжым ончаш, колышташ йӧратенам, парняже-влакым эскеренам. Тиддеч вара мыят кыртмен шокташ тунемынам.

Концерт деч вара, икмыняр кече эртымеке, Иванлан военкомат гыч повестке толын. Ик ийлан рвезе салтак илышыш вончен. Музыклан шӱман улмыжым йолташыже-влакат шижын шуктеныт, поснак марий мурым колышташ йӧратеныт. 

Армий деч вара театрыш пӧртылмекыже, И.Соловьёв «Тулар ден тулаче» спектакльыште Вадимын, «Йӧратымаш? Йӧратымаш! Йӧратымаш…» постановкышто Германын образшым чоҥен. Тиддеч посна тудын рольжо-влак «Русский секрет», «Цилиндр» спектакльлаште улыт, «Саликаште», «Юмынӱдырыштӧ»  массовкышто модеш.

— Театрыште у шӱлышан, у сюжетан постановкым ужмо шуэш. Мутлан, фехтованиян спектакльым шындаш гын, сай ыле.  Тыгайыште актер мастарлык веле огыл, пластикат палдырна, — шонкала Иван. — Москосо театрлаште тыгай спектакль-влак улыт.

Алевтина Байкова.

(Фотом театрын архивше гыч налме.)

 

 

Опубликовать в Одноклассники

Добавить комментарий