Йоча да самырык-влаклан театр-рӱдер пелен чумыргышо «Усталык вий» лӱман ушем нерген газетыштына возенна ыле. 30 июньышто антреприз театр Медведево районысо Пекшиксола ялысе культур пӧртыштӧ икымше пашажым — Марий Элын сулло артистше, режиссер В.Григорьевын «Мариемын ватыже» пьесыж почеш тыгаяк лӱман койдарчыкым — ончыктыш.
Спектакльыште ялысе пӧръеҥын паша укелан кӧра мӱндыр кундемыш коштмыжо, пропискылан кӧра тушто вес ӱдырамаш дене ешым чумырымыжо, илышын тӱрлӧ шӧрынжӧ годым лишыл йолташын пелен улмыжо нерген ойлалтеш.
Мыскара сынан постановкым ончаш калык шукак погынен огыл ыле гынат, моткоч шокшын вашлийын. Залыште шинчыше-влак артист-шамыч дене пырля ойгыреныт, тургыжланеныт да утен каен воштылыныт.
Тиддеч вара антреприз театр Шернур ден У Торъял кундемышкат миен толын.
А.Байкова.
(Фотом антреприз театрын альбомжо гыч налме.)
