Тиде кечылаште Йошкар-Ола аэропортлан лӱмым пуымо шотышто калык йӱклымашын пытартыш кужытшо эртыме нерген увертаралтын ыле. Тушко Марий Элысе Общественный палатын ВКонтакте соцкылысе лаштыкыштыже ушнаш лийын, но….
Йуклымашке 3 тӱжем наре еҥ ушнен шуктен. Пытартыш кужытышто куд кандидат – Андрей Яковлевич Эшпай, Николай Кириллович Кокорин, Сергей Григорьевич Чавайн, Виктор Викторович Севастьянов, Пётр Васильевич Ураев – кокла гыч иктыжым ойырен налаш кӱлын. Нунын кокла гыч ик эн шукын А.Эшпайлан да Н.Кокоринлан ӥӱкленыт. Кокымшыжлан – 4 процентлан шукырак. Совет да Россий композитор, пианист, педагог, мер пашаеҥ Андрей Эшпайым ме сайын палена – Йошкар-Олан, Козьмодемьянскын почётан гражданинже. Тудын лӱмжым Йошкар-Олаште тӱвыра да сымыктыш колледжын актовый залжылан пуымо. Тудын лӱмеш самырык исполнитель-влакын конкурс-фестивальышт эртаралтеш.
А теве кокымшо кандидат нерген чыланжак огыт пале. Николай Кокорин – тыглай кресаньык ешыште шочшо рвезе, салтак илыш гыч тӱҥалын, офицер марте шуын. Икымше тӱнямбал сарын геройжо, мемнан земляк-влак кокла гыч икымше лётчик, руш императорский армийын ассше «За храбрость» шӧртньӧ Георгиевский оружий дене палемдалтын. Ты наградын тичмаш кавалерже лийын. Российысе военный лётчик-влак кокла гыч икымше да эн сайже лийын манын палемдыман. 28 ияш улмыж годым тудо немыч-влак дене кредалмаште шке вуйжым пыштен.
Йӱклымаш шотышто соцкылысе лаштыкыште ӱчашымаш тарванен. Южиктышт молан Кокоринын лӱмжым виеш тушкеда манынат возеныт. Вараже, Мер палатын еҥже-влак, йӱклымашке ушнышо аккаунт-влакым шерын лекмыкышт, нунын реальный огыл еҥ-влакын лаштыкышт улмым пеҥгыдемденыт. Санденак йӱклымаш заинтерсованный лица-влакын, технический йӧным кучылтын, утларак йӱкым поген кертмышт шотышто таҥасымашке ынже савырне манын, Общественный палате ты процедурым чарен шогалтен.
Ынде Общественный палате иктешлымашым ыштыме годым ты але вес кандидатым ойырен налаш темлыме шотышто тӱрлӧ мер организацийын ходатайствыштым, тӱшка калыкын, эксперт-влакын шонымашыштым шотыш налеш. Вара иже ты але вес кандидатурын лӱмжым аэропортлан пуымо шотышто РФ Общественный палатылан темлаш тӱҥалеш.
С.Носова
