СЫЛНЫМУТ

ЧЫЛА САЙ ЛИЕШ

Алёна таче йӧршеш ыш мале. Йӱд мучко палате окнам йӱр лупшыш, кокланже кӱдырчат рашкалтен колтыш. Пелйӱд эртымекат коридорышто пеш куржтальыч, йӱкынак кутырышт. Адакат неле черлым конденыт чай. Эх, молан йоча-шамычше черланат гын. Йӧра, илышым илен эртарыше шоҥгыеҥ гын, нӧргӧ айдемыже таза капкыланак лийшаш огыл мо?

Эмлымверышке Алёна вучыдымын логале. Кок тылзаш ньогаж дене теве ынде кум арня наре кият. Алят диагнозым шынден огыт керт. Эре ала-мом тергат, эскерат, вӱрым чарныде налыт, снимкым ыштат. Ушет веле кая.

Чыла сай ыле. Тылзаш лиймекше, Дима эргыжлан чыла врач-влак деке черетан тергымашыш направленийым пуышт. Кажныж деке миен шуыч, чыла терген нальыч. Нимо уто-ситым ышт му. Икмыняр жап гыч Алёна шекланыш: аза шорташ тӱҥалмекше икмыняр секундлан шӱлышым йомдара. Тыге лийшаш огылыс. Невролог декат возалтыч. «Тургыжланаш нимолан, южгунам тыге лиеда», – мане чалемше ӱпан врач. Шке пашажым палыше аксакал дене ӱчашаш оҥай огыл…

Ик чевер кечын изи Димукшо нелын шӱлаш тӱҥале. Аважын шӧржымат ок коч, вӱдымат ок подыл. Самырык ава лӱдын колтыш. Тыгайже нигунам лийын огылыс. Кечывал лишан шортмо йӱкшат эркышныш. Алёна, кӱлеш кагазым ямдылен, содор вашкеполышым ӱжыктыш. Пеш писын тольыч. Йоча деке шуко огыт вучыкто аман. Врач азам ончале да тунамак, ясле тӱрыштӧ кечыше изи одеалеш пӱтыралын, лектын куржо. «Почешем!» – шоктыш. Алёна халат да пӧртыштӧ коштмо тапычке денак почешышт чошыш. Эх, мом чыташ перныш тиде эмлымверыш кайыме корнышто, шкеже да Юмо веле палат… Пел корнеш изи падырашыжын шӱлышыжӧ йӧршынак эркышныш, кидшерже йомаш тӱҥале… Алёнан кидше  гыч йочам поген налын, врач уколым, массажым ыштыш – мо моштымыжым, мо палымыжым кучылтын, изи ньоган шӱмжым эмлымверыш миен шумеш ылыжтыш. Йӧра, врачше кугу опытан, кӱкшӧ квалификациян логалын. Тыге Алёнан изи падырашыже реанимацийыш логале. Тушто вич кече кийымеке, теве ынде кок арня наре лиеш, палатышке кусарышт. Эргыжын мален колтымекше, Алёна эре шӱлышыжым колыштеш, изи кизажым кучен, икаше ончен шинча. Шкеже мален колташ лӱдеш. Шеклана, трук адак шӱлашыже нелемеш. Южгунамже эмлыше врачат вурса да… Икмыняр ганаже малыме эмым йышт йӱктен малтеныт.

Теве тачат омо уке. Воктен койкышто кийыше самырык суас ватат йӱдвошт нюслен кийыш. Кажне кечын шортеш… Очыни, чон йӧсыжым шинчавӱд дене мушкын колтен кертам, шона? Алёна нимом ок пелеште. Тек шортеш, южгунам, чынак, луш каен шортат да, ласкарак лиеш. Тидым ынде сайын пала…

Татар ӱдырамаш дене Алёна икымше кечынак палыме лийыч. Реанимаций отделенийын кудымшо пачашыж гыч волымеке, Димажым ты палатыш пыштышт. Пырдыж воктене кок ясле, ваштарешышт тынарак койко ден тумбочко. «Кок веран палате, тидыже сай, калык шуко огыл», – тунам Алёна шоналтыш, вургем-арверыштым погкален, ик тумбочкыжым айлыш.

– Теве тиде пӱкеным воктекет шынде, азатым пукшаш шинчашет йӧнанрак, – темлыш самырык ӱдырамаш, эҥертышан пӱкеным ясле воктеке конден шындыш.

– Тыландаже огеш кӱл мо?

– Мыйын теве воктенемак эше икте уло,– пелештыш.

– Мый шинчен пукшен ом керт, шӧрым зонд гочын эргымын пагарышкыже вик йоктарем. Тыге кӱштышт… – Алёна чукайжым кидышке налын кертдымыжлан шӱлыкаҥе. – Теве але кислород пучшымат ышт кораҥде.

– Туге… Тыште нуным колышташ кӱлеш. А лӱметше кузерак? Шаҥгысек кутырена, лӱмым йодаш тептерна уке, – виеш шыргыжале у палымыже.

– Мый Алёна улам, эргым – Дима. А тендажын кузерак?

– Розалия. Ӱдырем – Ралина.

Анжела МИХАЙЛОВАН ойлымашыжым газетнан

18, 25 майыште лекше номерлаштыже лудса.

Газетлан подпискым ышташ ида мондо!

Опубликовать в Одноклассники

Добавить комментарий