26-29 апрельыште республикысе самодеятельный театр коллектив-влаклан «Каскад» фестиваль-лабораторий эртен.
Ныл кече жапыште 13 театр мастарлыкым ончыктен. Нунын кокла гыч Кужэҥер гыч «Воштончыш», Волжский районысо Карай да Морко калык театр-влак марий спектакльым ончаш темленыт.
Артист-шамыч Марий самырык театрын, Сеҥымашын XXX идалыкше лӱмеш культур полатын, Медведево посёлкысо тӱвыра да каныме рӱдерын сценылаштыже модыныт.
Кажне спектакль шкешотан, коллектив-влак тачысе илыш дене кылдалтше, пӱсӧ йодышым тарватыше спектакль-влакым ончыкташ тыршеныт. Артист-влакын мастарлыкыштым жюри аклен.
Фестиваль жапыште театр коллектив-влакым вуйлатыше ден методслужбын специалистышт-шамычлан усталык лабораторий эртен.
Гран-прим калык коллектив лӱм дене палемдалтше «Маска» самырык театр (Медведево посёлкысо тӱвыра да каныме рӱдер) налын. Икымше степенян лауреат лӱмым – Сеҥымашын XXX идалыкше лӱмеш культур полат пеленысе «В старом доме» театр-студий, кокымшо степенян лауреат лӱм дене Волжск оласе йоча да самырык-влакын усталык полатышт пеленысе «Оберег» театр-студий ден Оршанке посёлкысо Н.Лузгинов лӱмеш руш драме театр палемдалтыныт, а кумшо степенян лауреат лӱмым Морко калык театр «Мӱкш отар» спекткльже дене сеҥен налын.
Тиддеч посна жюри артист ден режиссёр-влакын пашаштым тӱрлӧ номинацийыште палемден. Тидым республикысе Калык усталык да тӱвыра ден каныме паша шотышто шанче-методике рӱдерын сайтыштыже ончаш лиеш.
А.БАЙКОВА
