Республикыште пасу паша тургым умбакыже шуйна
Тенийы шошо йӱран да йӱштӧ шогымылан кӧра ага паша ятырлан почеш кодын тӱҥалын. Тыге май тӱҥалтышлан ӱмаште чыла озанлык икияшым ӱдаш лектын да ятыр кумдыкыш урлыкашым вераҥден гын, тений Волжский, Медведево, Морко да Шернур районла гына ты пашашке эн ончыч ушненыт да май тӱҥалтышлан шотлымаште 526 гектарыш ӱденыт.
Тиде гана тӱшка ден фермер озанлык-влак икияшым чылаже 152 тӱжем гектарыш ӱдышаш улыт. Тидыже кодшо ийысе нарак. Икияш пырчан да отызан кушкыл-влак 102,5 тӱжем гектарым айлат, технический культур-влак – 8,2, (тидын шотыштак долгунец-йытын 400 гектарым), пареҥге – 12, пакчасаска – 3,9, кормалык культур-влак – 25,4 тӱжем гектарым.
Озанлыклаште кокияш озымым, шукияш шудым умбакыже тырмалат, ешартыш кочкышым пуат, икияшым ӱдышаш мландым ямдылат, урлыкаш пырчым аяртат.
В.СМОЛЕНЦЕВ
