ЭРТЫШ ИЛЫШ ДА КРАЕВЕДЕНИЙ

Тутай – марий Арминий…

26 апрель -Марий Талешке кече

 Марий калыкын Тутай лӱман талешкыжат лийын. Лач ты шӱдӧвуйын кучымо кундемыште 1584 ийыште Царев ола шочын, таче тудо Йошкар-Ола маналтеш. Татар йылме гыч кусараш гын, Тутай – «пеледыш» манмым ончыкта. XVI курымышто марий тӧра-влакын лӱмышт тӱҥ шотышто тюрк калыкын гыч лектыныт, мутлан, Акпарс (ош барс), Акпатыр (ош патыр), Адай (изирак), Мамич-Бердей (Мамыш-Берди) (ик ава чызым кочшо юмын пуымо иза-шольо). Тидыже тунамсе илыш радам дене кылдалтын: пеш кужу пагыт (IXXVI курымла) марий-влак тюрк кугыжаныш образований-влакын (Хазар каганат, Волжский Булгарий, Шӧртньӧ Орда, Казанский ханстве) кид йымалнышт лийыныт. Тыгай умылтарымашат уло, Тутай — акрет марий шомак, «туго», «туто» – кӱын шушо, тичмаш умылымашым ончыкта.  

Тутай нерген увер шукыжак огыл. Икымше гана тудын нерген лачшымак Тутай волость нерген (тушто воевода Д.П,Елецкий олам негызлен) Н.М.Кармазин возымыж годым ушештарен. Варажым историк А.Г.Бахтин  поляк-литва король Стефан Баторийлан  посол-влак дене пырля колтымо  наказым верештын, кудыж нерген эше М.Кармазинак ушештарен. Теве тиде ужаш лачшымак Какшан эҥерыште Царев олам ыштыме нерген уверым пеҥгыдемда: «И послом говорити, что дальние волости луговые, которые поддались ко Сибири, учали было воровати, и государь наш посылал воевод своих князя Дмитрея Петровича Елецкого с товарыщи те волости укрепити и воров сыскав перевешати. И государя нашего воеводы тех волостех изменников всех сыскав казнили, а в большей волости в Тутаеве, от которой все воровство ставилось, город поставили. И Казанская вся земля во всей государя нашего воле утвердилась, а ясаки платят государю нашему по-прежнему». Тиде возымо гыч икте рашемеш: Тутайын кид йымалныже кугу волость лийын. Варажым тудо Моско ваштереш кайыше толкынын рӱдерышкыже савырнен. А тидыже кумшо черемис сар годым (1581-1585) ийлаште лийын. Тутай марий повстанец-шамычын ик вуйлатышыже лийын, да варажым тудымат казнитленыт, очыни.

Кокымшо гана Тутай нерген XVIII курымышто ушештаралтын. Историк А.Г.Иванов служитлыше марий торкан-влакын показанийыштым верештын. Нуным 1747 ийыште Царевококшайскысе воеводын канцелярийыштыже ыштыме. Нине показаний почеш теве мо рашемын: «По реке Шое служилая тарханская земля, называемое Тутаево поле в оной Малой Ошлинской волости имеетца.» Тугеже Тутай пасу Царевококшайск ола деч йӱдвелкыла лийын (кызыт Тарханово район верланыме олмо). Нимогай кокытеланымаш деч посна пеҥгыдын каласаш лиеш: тудо кумдык XVI  курымышто Кугу Тутай волостьыш пурен. Ты документ гыч тыгак рашемеш: Тутай  торкан лийын. А торкан – тиде налог да моло йозак деч утарен кодымо, кресаньык деч посна илемым кучышо оза, но тудо военный службым шуктышаш улмаш.

Торканже Тутай 1570 ийыште лийын, очыни. Тиде чиным да кугу волостьым тудлан руш кугыжа ончылно кугу суапым ыштымыжлан пуэныт. Марий войска-влакын ик вуйлатышыже семын 1558-1583 ийлаште эртыше Ливон сарыште лӱддымылыкым  але Российын кечывалвел рубежше-влакым аралымаште шкенжым поснак сайын ончыктымыжлан тудым лач тыге аклен кертыныт. Ливон сарыште марий сарзе-влакым поснак пагаленыт: шке лӱддымылыкышт дене нуно руш войскаштат пагалымашым суленыт, ваштареш кредалше-влакат лӱдыныт.

Тыгаят лийын кертын, Тутай Кокла Юл кундемыште кокымшо черемис сар годым (1571-1574) Моско кугыжаныш ваштареш шогалше-шамычым кырен шалаташ полшен. Кеч-мо гынат Тутайым кугыжаныш администраций пагален да тудлан ӱшанен. 1580 ийыште, кунам ногай князь Урус олыкмарий-влакым руш мландыш пырля походыш ушнаш кумылаҥдаш тӱҥалын, Тутай марий-влакым вуйлатыше моло лужавуй дене пырля тореш лийын. Ногай ордаште руш посол шке донесенийыштыже марий-влакын шомакыштым тыге намиен шуктен: «Нам деи государем царем и великим князем не воеватца. И так наших вин перед государем много, он к нам сторожей приставил и лутчие лошади у нас поимал». Тидын деч вара кугыжан администрацийже Тутайлан утларак гына ӱшанаш тӱҥалын. 

Но 1581 ийыште сӱрет вашталтын: Стефан Баторийын вуйлатыме поляк-литва войска-влак Псковым авырен налыныт, ногай ден крым татар-влак руш кугыжан кечывалвел чекышкыже эре гаяк керылтыныт, а Урал кундемыште сибирьысе татар,  хант, манси, эрвел марий-влак Строгановмыт промышленник-влакын кумдыкыштым толаш пижыныт. 1581-1582 ийысе телым тыгай сӱрет Кокла Юл кундемым тӱрыс авлтен. Тушто олыкмарий, татар, одо, курыкмарий, чуваш-шамычат иленыт. Мо оҥайже: руш кугыжа ваштареш кредалше-влак коклаште Тутайын вуйлатыме марий отряд-влакат лийыныт. Молан тыге лийын кертын? Ливон сар гыч сеҥыше да герой семын пӧртылмеке, Тутай мӧҥгыштыжӧ марий-влакым руш кугыжа шотлаш тӱҥалеш манын шонен. Но мом тудо ужын: икымше да кокымшо черемис сар пагытыште марий мланде пустаҥын, ятыр ялым йӱлатеныт. Марий калыкын пагалыме еҥжым тиде ойгандарыде кертын огыл. Тудо тунамак эрык верч шогалын кертше войскам чумыраш тӱҥалын.

Тутайым марий Арминий манашат лиеш: мемнан эрын икымше курымыштыжо римлян ваштареш востанийым тарватыше херусак тукымын вождьшо семынак руш кугыжа ваштареш восстанийым нӧлталын, кеч ты марте кугыжан администрацийже тудлан кугун ӱшанен.

Кугыжа ваштареш кынелше марий-влак ончыч партизан сарын йӧнжӧ-влакым кучылтын аралалтыныт, поход-влакым эртареныт. «Новый летописец» документыште кузе вашпижмаш кайыме нергенат ушештаралтеш: «Они же в погании аки звери суровстии, противяхусь против рати московские; аки змеи ядаху человека жалы своими, тако же и они погани побиваху московских людей, овогда на станах, овогда на походех; бояре же не можаху их обратити».

 Тиде вашпижмаш нергенак Н.М.Кармазин тыге возен: «Бунт черемисский продолжался да конца Иоанновой жизни с остервенением удивительным: не имея ни сил, ни искусства для стройных битв в поле, сии дикари свирепые, озлобленные, вероятно, жесткостию царских чиновников, резались с московскими воинами на пепле жилищ своих, в лесах и вертепах, летом и зимою, хотели независимости или смерти».

Руш правтельстве тунам кужун  шуйналтше Ливон сарым пеш писын мучашлен. 1582 ийыште Речь Посполитая дене тыныслык нерген ойпидышым ыштен, а Швеций дене 1583 ийыште. А шкенжын тӱҥ  вийыжым Кокла Юлысо калыкым лыпландараш кусарен. 1583 ий шошылан  кугыжан войска-влак Кокла  Юлын кугу ужашыжым лыпландарен кертыныт. Сеҥымашым пеҥгыдемдаш манын, 1593 ийыште Козьмодемьянск олам негызлен. Но олыкмарий-влак  1585 ий шошо марте торешланеныт, ты сӱрет 1584 ий августышто Тутай волостьышто Царевококшайск крепостьлан да 1585 ийыште январь-февральыште  Кугу Какшан эҥерыште Царевосанчурск крепостьлан негызым пыштымеке веле пытен. 1585 ийыштак Соловецкий летописьыште возымо почеш «добили челом государю царю и великому князю Федору Ивановичу всея Руси черемиса вековым миром».  Но ты пагытлан Тутай ты тӱня дене чеверласен улмаш.  

Сергей Свечников,

историй науко кандидат.

Снимкыште: Тутай пагытысе марий сарзе.

Угарман гыч историк Борис Илюшинын пашаже.

Марий калыкын историйыштыже шуко талешке лийын. Ме Полтышым, Чумбылатым, Акпатырым, Мамич-Бердейым, Чоткарым, Пашканым, Акпарсым гына шукынжо палена. А молыжым учёный историк-влак веле, очыни. Сандене нунын шымлымаштышт вашлиялтше марий талешке-влакын лӱмыштымат ушештарен кодымак шуэш. Тек нунын нерген марий калыкна пала: Абыз, Акпатыр, Акмазик, Алека Черемисин, Алтыш, Атачик, (Анчик) Адай Шамаршинский, Ахмачек (Акметек) — патыр, Аникей Кошаков,  Енебяк, Елпай Токшейков Кака, Казимир, Кельдибек, Кочак (Качак), Коджа-Ералтем, Никита Байборода,  Рознега Черемисянин, Янтемир, Аказ, Ковяж, Кокша, Иден, Камай  да молат…

                                 Савыкташ С.Носова ямдылен

Опубликовать в Одноклассники

Добавить комментарий