КУЛЬТУР ДА ИСКУССТВО

«Айо» Курыкмарийыш сеҥымаш дене пӧртылын

23-25 июньышто Рязань областьысе Сасово олаште композитор А.П.Аверкинлан пӧлеклалтше калык усталык фестиваль колымшо гана эртен. Тушко Угарман, Тамбов, Рязань, Ростов кундемла, Москва, Самара, Новосибирск олала, Мордовий да Марий Эл республикла гыч солист ден усталык коллектив-влак ушненыт. Марий кундемнан чапшым Курыкмарий районысо «Айо» фольклор ансамбль нӧлтен. Фестиваль жапыште 14 еҥан коллектив регион-влак кокласе калык муро конкурсышто мастарлыкым ончыктен. Ансамбль «Сола лоэт дон кеӓш яжо» ден «Шикӓ-викӓ» муро-влакым йоҥгалтарен да икымше степенян лауреат лӱмым сеҥен налын.

Самырык мурызо Ирина Юшкиналанат пиал шыргыжалын. Тудо «Кидыштем шӓргӓшем» ден «Шанымем» муро-влакым колышташ темлен. Лу участник гыч Ирина сеҥышыш лектын.

Фестивальын жюриштыже палыме артист да музык аланыште шуко ий тыршыше лу еҥ лийын. Нунын коклаште композиторын пелашыжым, Галина Васильевна Аверкинам, ужаш куанле ыле. Тудо курыкмарий муро-влакым кӱкшын аклен: «чон вошт колтен, мастарын мурат» манын.

«Айо» ансамбльын концертмейстерже —  Российкультурын сулло пашаеҥже Арсений Яйцов. Тудат фестивальын ик эн йӧратыме унашкыже савырнен.Тиддеч посна А.Яйцов гармонист-влак концертыш кумылын ушнен.

— Тушто мый Людмила Зыкинан ансамбльжын участникышт-влак дене вашлийынна. Тидлан моткоч куаненам, — куанжым пайла Арсений. — Тиддеч посна Аверкинын шочмо кундемышкыже, Шафторка ялыш, миен коштынна. Тушто композиторын пӧрт-тоштерже верланен.

— Сасовыш миен толмо кужу жаплан шарнаш кодеш. Тушто ме у йолташ-влакым муынна, вес фестивальыш ӱжмашым налынна, вес гана тӱрлӧ конкурсышто мастарлыкым ончыктымо шотышто ой-каҥашым колынна, — палемдыш «Айо» ансамбльын вуйлатышыже Тамара Петрова.

А.Байкова.

В.Петрован фотожо.

Опубликовать в Одноклассники

Добавить комментарий