Энергетике

Шекланыза, эскерыза!..

«Рӱдӧ да Юл кундем Россеть Мариэнерго» элекролинийым аралыме кумдыкышто шошым ялозанлык пашам шуктымо, тыгак кугу техникым кучылтмо годым лӱдыкшыдымылык правилым шукташ кӱлмӧ нерген ушештара.

Предприятий, организаций да учреждений-влакын вуйлатышыт, посна предприниматель ден тыглай еҥ-влак электролинийым да подстанцийым аралыме кумдыкышто кеч-могай пашам шуктымо деч ончыч энергетик-влак дене кутырен келшышаш улыт. Тидыже РФ правительствын 2009 ий 24 февральысе 160-шо №-ан пунчалже дене келшышын шукталтеш. Лачак тудын дене ты шотышто правилым пеҥгыдемдыме.

Энергообъектым аралыме кумдык тудын воктене электровий дене эҥгекыш логалме деч аралалтме шот дене палемдалтын. Тиде кумдыкшо тӱрлӧ куатан электролиний шуйналтме кок велым напряженийын кугытшо дене келшышын икте гыч коло метр наре лопкытым айла.

Электровоштырым спецтехнике кузов дене вучыдымын тӱкымӧ годым токын мландыш перымыже колымашке шуктен сеҥа. Водитель тыгай годым транспорт средстве гыч лекшаш огыл, а лӱдыкшӧ вер деч умбакырак, мутлан, воштыр кӱрылтмӧ годым 8 метр деч торашкырак, кудалшаш. А лӱдыкшӧ вер деч кораҥмеке, тудым кузе-гынат авырыман да шижтарыше знакым пижыктыман. Вара кӱрылтыш нерген РЭС диспетчерлан, верысе администрацийыш але единый дежурно-диспетчерский службыш увертарыман. Энергетик-влакын бригадышт толмешке, поснак пычкемыш жапыште, ты верым оролыман. Тидыже еҥ-влакын илышыштым да тазалыкыштым арален кодышашлан ышталтеш.

Энергообъект лишне нигӧлан шижтарыде, иктаж-мом ыштымаш да тушко тӱкнымаш азапыш шуктен, потребитель-влакым электровий деч посна коден, пожарым ылыжтен сеҥа. Электролинийым аралыме кумдыкышто правилым пудыртымылан титакан-влак РФ-ын Административный правам пудыртымо нерген кодексше дене келшышын мутым кучат.

Ю.ИСАКОВ

Опубликовать в Одноклассники

Добавить комментарий