Республикысе тӱҥ электросеть компаний Кайыкын тӱнямбал кечыжлан пӧлеклалтше йоча сӱрет конкурсым иктешлен. Тудо «Мариэнерго» филиалыште Экологий лӱдыкшӧ деч аралалтме кече дене келшышын эртаралтын.
Конкурсышто филиалысе структур подразделений-влакын пашаеҥыштын коло утла йочашт мастарлыкыштым тергеныт. Нуно тӱрлӧ йӧн – акварель, гуашь, карандаш, пастель, фломастер – дене сӱретленыт. Но тылеч ончыч ачашт-авашт дене пырля кайык-влакын илышыштым да койышыштым шымлен ончалыныт.
Чыла йоча шке моштымыжым ончыктен. Южышт сӱретлыме дене пырля кайык-влакым аралаш да нунын тӱрлӧ улмыштым переген кодаш ӱжын возеныт. Энергетик-влакын икшывышт молын деч сайынрак палат: кугу куатан электровоштырыш шичше шагал огыл кайык кола, санденак линийыште кайыкым аралыше устройствылам шындат.
Сайын сӱретлыме дене пырляк жюри шке семын шонен моштымым почын ончыктымым шотыш налын. Икымше верым шым ияш Роман Парсаевын (Шернур РЭС), кокымшым латкум ияш Мария Долгован (Курыкмарий РЭС), кумшым латик ияш Анна Ложечникован (филиалын исполнительный аппаратше) сӱретышт налыныт.
Конкурсыш ушнышо чыла йочалан творчествыштлан кӱлешан пӧлекым, а сеҥыше-влаклан шке мастарлыкыштым кушташ «Мариэнергон» профсоюз организацийже деч грамот ден призым кучыктеныт. Нунын пашаштым филиалыште коймо верыш сакат. Филиал шке пашаеҥже-влакын йочаштын усталыкыштым вияҥдыме пашаланат полша. Вет тидыже кушкын толшо тукымым, нунын тӱня ончалтышыштым шуарымаште пеш кӱлешан, палемден «Мариэнерго» филиалын директоржо Сергей Хлусов.
Ю.ИСАКОВ
