«Рӱдӧ да Юл кундем Россеть Мариэнерго» республикыштына вӱдшор годым электровийым пуымо дене кылдалтше аварий лӱдыкшым кораҥдыме шотышто тунеммашым эртарен.
Тунеммаш Курыкмарий районышто лийын. Тренировко жапыште «Мариэнерго» филиалын штабше кундемыштына аварий ситуацийым кораҥдыме годым кучем органла дене могай кыл лийшашым радамлен. Тушко тыгак район администраций вуйлатыше Наталья Арганякова, Козьмодемьянскын мэрже Михаил Козлов, Россий МЧС-ын, Ростехнадзорын, Марий Элын Граждан обороно да калыкым аралыме комитетшын представительже-влак, «Энергий» АО-н бригадыже ушненыт.
Шонен лукмо амал почеш, пуйто вӱдшор жапыште Юнга эҥер чот шарлымылан, ий дене пералт, электромеҥге камвочмылан да кугу подстанций эҥгекыш логалмылан кӧра изирак икмыняр трансформаторыш энергий толмым чарнен. 7436 еҥ илыман 62 ял тул деч посна кодын. Ты радамышкак социально кӱлешан икмыняр объект – кум школ да вич йочасад – логалын.
Тунеммаш годым уверым писын да раш пуымылан посна тӱткыш ойыралтын. Мыняр потребитель ден электрооборудований тул деч посна кодмым шотыш налын, утарыше вий ден средствым ушымо. Кушто да могай кумдыкышто тул йӧралтме, тидым тӧрлаш мыняр жап кӱлмӧ, олмыктышо бригаде кунам лекме – чыла раш ончыкталтын.
«Йӧрталтше куатын» кугытшо, условий почеш, 4,81 мегаватт лийын. Аварий эҥгекым кораҥдыме пашаш 24 еҥан 8 бригаде, 19 единице технике (буритлыше кок кран машина, напряженийым кораҥдаш полшышо кок автомат, меҥгым шупшыктышо машина, кок кран, снегоход ден кок пуш) ушалтыныт. Троицкий Посадысе кыдалаш школлан электровийым ситараш манын, илемыш бригадым да 50 киловольт куатан дизель подстанцийым колтымо. Курыкмарий РЭС негызеш кече мучко ыштыше аварий шапаш складым да пашам ыштыше бригаде-влаклан шокшо кочкышым ямдылыме верым организоватлыме.
Аварий да олмыктымо дене кылдалтше тунеммаш сайын эртен: дежурный-влак мом палемдымым писын да шот дене шуктеныт, пурышо уверым жапыштыже налын да колтен шогеныт, потребитель-влаклан тулым кӱчык жапыште пӧртылтеныт.
«Рӱдӧ да Юл кундем Россеть» генеральный директорын алмаштышыже – «Мариэнерго» филиалын директоржо Сергей Хлусов тренировкым иктешлен каласен: «Тыгай кугу тунеммаш филиалын шке подразделенийлаж дене веле огыл, тыгак верысе администраций да МЧС структурла дене кылым пеҥгыдемдаш полша, тидын шотыштак – вӱдшор годымат. Мемнан филиалыште вӱдшорын эҥгекше ваштареш кучедалме шотышто комиссий пашам ышта, тудо тӱрлӧ подразделенийын пашажым виктара, эҥер лишне але вӱд шарлен кертме верлаште улшо электросеть объектлам терген шога. Социально кӱлешан объект-влак поснак эскералтыт. Вучыдымо азап лийын кертмылан тулым пуаш шапаш источник уло. Вӱдшор жаплан филиалыште олмыктышо бригадылам чумырымо, спецтехникым, ийме да кыл средствым ситарыме».
Ю.ИСАКОВ
