Тений январь-мартыште Марий Элыште спиртан йӱыш дене аяргыме 52 случайым регистрироватлыме, тыгодым 43 еҥ колен. Тидыже ӱмашсе деч 6 да 17 случайлан шукырак. Аяргыме 88,5 процент случай этанол негызан йӱыш дене кылдалтын, 5 – метанол дене, 1 – рашемдаш лийдыме спирт дене.
Эн шуко еҥ Йошкар-Олаште аярген – 17 (ты чот гыч 12 еҥ колен), 6 – Медведево районышто (4 еҥ колен), 5 – Морко районышто (иктыжынат илышыжым арален коден кертме огыл), 4 дене – Волжскышто да Звенигово районышто (чыланат коленыт), 3 – Кужэҥер районышто (иктат илыше кодын огыл), 2 дене – Килемар, Марий Турек, Оршанке, Параньга да Советский районлаште (Советский районышто гына 1 еҥ илыше кодын), 1 – Козьмодемьянскыште, Волжский да Шернур районлаште (чыланат коленыт).
Промышленностьышто ямдылен лукмо начар качестван алкоголь дене аяргыме случайым регистрироватлыме огыл.
М.ИВАНОВА
