Шукерте огыл кумдан палыме журналист Юрий Дудьын YouTube каналыштыже «Просвещений провинцийым кузе вашталтен кертеш» маналтше видео лектын. Тушто «Кружок» ушем Марий Элыш толмышт нерген каласкалат.
Интернетлан кӧра тора ялыште илыше-влакат у да оҥай профессийым налын кертыт. Пиалым кугу олаште веле огыл, «провинций» манме изирак олалаште да яллаште муаш лиеш. Тыгай шонымаш дене «Кружок» ушемын участникше-влак тора да палыдыме верлаш лектын коштыт. Ийлан икмыняр гана нуно Россий регионла мучко йоча-влаклан арнясе школым эртарат. Тунемше-влакым мурым возаш, веб-сайтым ышташ туныктат, медиа нерген мутланат.
Ты ушем 2018 ийыште Марий Турек район Сардаялыште тӱвыра фестивальым эртарен.
«Март тылзыште ик арняш веб-разработко школым эртарыме. Йоча-шамычлан сайтлам доскаш сӱретлен ончыктымо. Интернет лийын гынат, пашам пеш начарын ыштен. Сардаялыш толын кайымына деч вара тушто интернетым ыштеныт, маныт.
Туныктымо курсым эртарен колтымеке, школ директор, Полина Сорокина ты кундемыш эше толаш ӱжын. Кеҥежым иктаж фестивальым эртараш шонымыж дене палдарен. Тыгак лие. 24-26 августышто, каныш кечын, тӱвыра фестивальым эртаренна. Верысе калык тудым пеш вучен», – палдарен мутланымаште «Кружок» ушемын ик вӱдышыжӧ Александр Братчиков.
Кажне яллаш лектын коштмо деч вара иктаж у проект «шочеш». Сардаялын гын, шке сайтше ышталтын. Тушто фестиваль, веб-школ нерген возымо. Тыгак историй рубрикыште 5 тӱҥ материалым вераҥдыме. Тиде «У школ», «Илыш интернет деч посна», «Сардаял пӱртӱс», «Тӱвыра», «Сардаял мучко гид». Йолташ-влак, тыландат sardayal.ru сайтыш пурен ончалаш темлена.
О.МОШКИНА
