Марий уголовно-исполнительный системын ик подразделенийышкыже куд у «пашаеҥ» службыш толын.
Чынжым гын тиде айдеме огыл, а пий улыт. Туге гынат нунат пашаеҥланак шотлалтыт. Акбай, Юргана, Амур, Юланда, Аргон да Юнес Россий ФСИН-ын Татарстанысе управленийжын служебный собаководство племенной питомникше гыч «толыныт». Мо оҥайже, кажныжын кӱлеш документышт: личный делашт, «паспортышт» – улыт. Туштыжо чыла данныйыштым, ача-аваштын, шкеныштын кум тукымышт марте палдарыме.
Нине пий-шамыч Йошкар-Оласе следственный изоляторышто, 4-ше №-ан пеҥгыде режиман исправительный колонийыште да конвоирований отделыште пашам ышташ тӱҥалыт. Но тылеч ончыч айдеме семынак икмыняр тылзе стажировкым эртат.
Марий УИС-ын кинологический службыштыжо тачысе кечылан 78 пий службышто улыт, палдара Марий Элысе УФСИН-ын пресс-службыжо.
Л.КАМАЛЕТДИНОВА
