Юл кундем кугыжаныш технологий университетыште Марий Эл Кугыжаныш Погынын депутатше-влакын кечыштлан пӧлеклалтше мероприятийыште Юл кундем кугыжаныш технологий университет ятыр у технике дене палдарен.
– Оҥай ты техникым механизаций ден машиностроений институтышто погымо, – ойла вузышто Студент конструкторский бюрон вуйлатышыже Игорь Аркадьевич Кудрявцев. – Кумытшым тыглай классический технологий почеш ыштыме, а нылымшыже – айдемын полшымыж деч посна коштшо «Белый кот» лӱман снегоход. Тудым лӱмынак Арктике условийлан ыштыме. Тыгай робот айдеме деч посна каен да шымлен, тыгак грузым шупшыктен кертеш. Шке паледа, Арктикыште йӱштӧ, техникылан условий пеш неле, а тыгай технике кеч-могай жапыште тушко лектеш да нимо деч ок лӱд, ок кумыкталт – лӱмын стабилизаций системым ыштыме. Эсогыл тугай верыш пура, кушкыжо вес технике пурен ок керт. Айдеме тиде техникым ик километр тора гыч виктарен кертеш.
Мероприятий годым моло технике денат палыме лийым. Теве – кугурак тыртышан вездеход-амфибий. Тудым конструктор-влак Юрий Охотин ден Александр Иванов погеныт. Тыштак Силикатный посёлко гыч иза-шольо Шкуровмыт дене палыме лийым. Николай вузышто кокымо курсышто тунемеш, а Андрей – школышто, индешымше классыште. Нуно гусеницан «Сайвер» снегоболтоход погеныт. Тыгай вездеход лумым эрыктен кертеш. Тудым тыгак чодыраште, Арктикыште кошташ кучылташ лиеш. Ты кечын университетыште мый «Патруль-СП» вездеход-амфибий, чодыраште тул ылыж кертме лӱдыкшӧ ваштареш «Лесничий» квадроцикл да моло техникым икымше гана ужынам. Тыгай оҥай проект-влак чодыра озанлыклан да обороно министерствылан, тыглай сонарзе-влакланат моткочак кӱлыт.
М.СКОБЕЛЕВ 
Авторын фотожо
Снимкыште: 7516 Вездеход-амфибийын конструкторышт Ю.Охотин ден А.Иванов 7523 -1 Иза-шольо Андрей ден Николай Шкуровмыт ден СКБ-м вуйлатыше И.Кудрявцев 7525 -1 Пилот деч посна коштшо «Белый кот» снегоход 7511 — «Лесничий» квадроцикл.
Г.Кожевникова ямдылен.
