ТАЗАЛЫК

Градусник пудырген…

Пытартыш ийыште термометр мӧҥгыштӧ веле огыл, моло вереат чӱчкыдын пайдаланыме ӱзгарыш савырнен. Организацийлаште капкыл температурым электрон термометр дене висат гын, мӧҥгыштӧ шукышт кызытат ртутян градусникым кучылтыт. Тыгодым поснак кугурак тукым тудым чӱчкыдын пудырта: я коҥлайымач кораҥдаш монда, я лывыргылыкым йомдарыше кид азапыш пурта… Тидыжым республикысе районлаште лийме годым илалше-шамыч деч шуэн огыл колаш логалеш. Тыгодым шукышт пудыргышо термометрым выньык дене ӱштылын налыт да шӱкшакым оптымо ведраш кудалтат, а вара – контейнерыш але коремыш… Тыге ышташ огеш лий, кочай-ковай-влак!
Градусникыште 2 г марте ртуть уло, куатым аралыше лампыште – 2,5 мг деч шуко огыл, 1000 нарылан шагал. Сандене пудыргышо термометрын, чынжым гын, тушечын йоген лекше ртуть гыч лекше парын, тазалыклан могай лӱдышкым ыштен кертмыж шотышто шкеак иктешлымашым ыштыза.
Градусникым пудыртымо годым вигак окнам але фортычкым, тыгай йӧн уке гын, омсам почса, моло пӧлем омсам пич петырыза. Конешне, тыгай азап лийын кайыме годым спецслужбым ӱжыкташ сайрак, но тудо рӱдола да райрӱдӧ деч тораште верланыше илемыш мия мо? Сандене маске ден перчаткым чийыза.
Ртутьым выньык, швабре але пылесос полшымо дене погаш огеш темлалт, уке гыч нуным кудалташ логалеш.
Аяран веществам резине грушо, скотч але пижедылше ленте, губко, тыглай кистычке да пеҥгыде кагаз (картон) дене погаш йӧнанрак. Вӱдыжгӧ щётко але кистычке утларак келшен толыт. Шолдыра шарикым кагазыш ӱштыл налза да 0,2 процентан марганцовко растворым, белизнам але хлоран средствым темыман йоҥгытыш колтыза, тыгыдыракшым пипетке але скотч, эсогыл кинде нӧнчык дене поген кертыда.
Тылеч вара градусник пудыргымо верым (кӱварым, оҥа кокласе шелшым, пырдыжым) шовын-содо раствор (1 л вӱдлан – 40 г шовын да 50 г содо) обработалыза.
Ртуть – аяран вещества, но чылажымат темлыме почеш ышташ гын, тудо тазалыклан кугу лӱдыкшым ок ыште. Ртуть йӧршан торым Йошкар-Олаште «ПЭК регион» ООО (Панфилов урем, 41-ше пӧрт, телефон: 8 (8362)551507) ден амалкалче Е.А.Ульданов (Лёня Голиковын изуремже, 9-ше пӧрт, телефон: 8 (8362) 741551) погат. Ртутьым кудалтыме нерген йодышым тыгак 112 телефон дене рашемдаш лиеш.

М.ИВАНОВА

Опубликовать в Одноклассники

Добавить комментарий