«Илыме вер да ола кумдык» нацпроектын «Оласе йырвелым йӧнаным ыштымаш» федеральный проектше илышыш шыҥдаралтеш.
2022 ийыште Марий Элысе олалаште могай верым уэмдаш да тӱзаташ кӱлмым калык шке ойыра. Йошкар-Олаште 19, Козьмодемьянскыште 9 да Волжскышто 3 объектлам сайлаш луктыныт. Йошкар-Олаште, мутлан, ик объектше – Какшан эҥерӱмбалне каныме верлам ыштымаш. Кумдыкым тӱзатыме пашам шуктымо годым тротуарым икмыняр вере вашталташ, велосипедым шогалташ стоянкым, художник да кидмастар-влаклан мастер-классым эртарашышт верым да выставкылык витриным, подиумым ышташ палемдыме. Тыгак олымбал, урно, арт-объект-влакым вераҥдаш, леведышым йӧнештараш, пушеҥге ден вондерлам шындаш темлымашым ыштыме.
Йӱклымаш 26 апрельыште общероссийский платформышто тӱҥалын да 30 май марте шуйна. Марий Элыште илыше-влаклан «https://12.gorodsreda.ru/» ссылке дене пурыман. Шке йӱкым иктаж верлан пуаш манын, Госуслуги портал гоч авторизацийым эртыман.
Л.СЕМЕНОВА
