Изобретательын да рационализаторын кечышт лӱмеш Александр Евстифеев республикысе вӱдышӧ промышленный предприятий, научно-шымлыше организаций, кӱшыл тунемме заведений, IT-компаний-влакын пашаеҥышт да кидмастар-влак дене вашлийын.
Республик вуйлатышын пашажым жаплан шуктышо чумыргышо-влакым пайремышт дене саламлен да палемден: республикын шымлызыже ден учёныйжо-влак наукым вияҥдымашке да у технологийым саемдымашке кугу надырым пыштат.
Вашлиймаште республикын инновационно-технологичный кумдыкшым вияҥдыме нерген докладым ыштеныт, марий изобретатель ден рационализатор-влакын йӧнышт нерген каласкаленыт, научно-шымлыме пашаште улшо нелылык-влак нергенат ойленыт.
— Федеральный Собранийлан Посланийыште элнан президентше IT-индустрий ик эн писын вияҥше отрасль лийын да тиде моткоч куандара манын каласыш. Мемнан компаний-влакын вес эллашке колтымо сатушт вич ий жапыште кок пачаш кушкын. Паша производительностьым кугемдыме нерген ойлымыж годым президент лишыл жапыште тиде производствым шарыме кӱшеш огыл, а IT-технологий-влаклан кӧра лийшаш манын, — палемден Александр Евстифеев.
Эл вуйлатышын ойлымыжо Марий Эллан пӱтынек келшен толеш, молан манаш гын республикын инновационный вий-куатше кугу. Тиде — вуз, технический рӱдеран промышленный предприятий, инноваций пашам шуктышо изи предприятий, научный мер организаций-влак.
Цифрым ончалаш гын, 2015 ийыште шымлымаш ден разработко-влакым эртараш организаций-шамыч 144 млн. теҥгем кучылтыныт. Пытартыш кум ий жапыште Роспатент 575 охранный документым (таҥастарен ончалаш гын, 2015 ийыште – 137, 2016 ийыште – 95), тидын годымак изобретенийлан 361 патентым (2015 ийыште – 84, 2016 ийыште – 54), 183 патентым пайдале модельлан (2015 ийыште – 36, 2016 ийыште – 40), 31 патентым промышленный образец-влаклан (2015 ийыште – 17, 2016 ийыште – 1) пуэн.
Кодшо ийын кум ончыл передовой технологийым разработатлыме гын, 2015 ийыште — 1, а 2008-2014 ийлаште иктат лийын огыл.
Ты сферыште пашам чолган эртараш республикысе вуз-влак полшат. Тидлан йӧным тушто улшо научный да научно-шымлыше лабораторий-влакын кумда материально-технический базышт, научно-образовательный да научно-учебный рӱдер, полигон да учебно-опытный базе-влак пуат.
Тиде вашлиймаштак изобретатель-шамыч инноваций проект-влакым ямдылыме системыште улшо нелылык нерген ойленыт. Изобретенийым предприятийлашке шыҥдарыме шотышто темлымаш-влакат йонгеныт.
Республикыште инноваций пашам ончыкыжым кузе вияҥдышаш нерген каҥашымышт годым погынышо-влак йоча да юношеский научно-технический творчествым вияҥдаш, самырык изобретатель-влаклан полшаш, инженерын статусшым кугемдаш, талантан самырык-влакым наукыш да конструктор пашашке ушаш кӱлмым палемденыт, икмыняр моло нергенат ойленыт.
Л.Камалетдинова.
